(North Cotabato/ July 28, 2015) ---Handang
harapin ni Cotabato 2nd District Representative Nancy Catamco ang kasong
isasampa laban sa kanya ng Karapatan- Southern Mindanao Region.
Ito ang naging reaksiyon ng mambabatas
matapos lumabas ang ulat na kakasuhan umano ito ng nasabing grupo kaugnay ng
marahas na pangyayari noong nakaraang linggo sa compound ng United Church of
Christ in the Philippines o UCCP sa Davao City.
Sinabi sa DXVL News ni Congresswoman Catamco
na handa nitong sagutin ang nasabing kaso sapagkat may mga nakalatag naman
itong ebedensiya.
Ayon sa Karapatan-SMR kabilang sa mga
isasampang kaso laban sa congresswoman ay ang serious physical injury, physical
assault, destruction of property, trespassing, malicious mischief, coercion,
grave threats, at violation of domicile.
Nagbigay rin ng update si Catamco na
hanggang sa ngayon ay nananatili ang mga lumad sa UCCP Haran at hindi umano
nabibigyan ng magandang pag aasikaso. Hindi umano nasusunod sa UCCP Haran ang
standard bilang evacuation center na naka base sa guidelines mula sa joint
secular na galing sa DILG, DSWD at depEd.
Samantala, inihayag rin ni Catamco na
inaasikaso niya sa kasalukuyan ang mga papeles sa imbestigasyon hinggil umano
sa report na ginagamit ang mga lumad upang makakuha ng pera sa ibang bansa.
Maliban kay Catamco, kakasuhan din ng
KARAPATAN-SMR sina Superintendent Lao ng Davao City Police Office, at Major
Jake Obligado ng Eastern Mindanao Command ng Armed Forces of the Philippines.
Sila raw ang nagbigay ng order sa mga pulis
at mga miyembro ng Alamara na isang grupo ng mga armadong lumad para pasukin at
sapilitang palabasin sa Haran compound ang may 700 mga katutubo.
Una nang napatunayan ng Karapatan na walang
court order ang pagpasok ng higit 100 mga pulis sa Haran.
Nakiusap na raw ang mga organisador sa mga
pulis na ‘wag pumasok sa compound ng Simbahan pero mapilit raw sila, sinira ang
gate ng evacuation camp, at hinaras ang mga lumad na nasa loob ng UCCP-Haran
compound.
Dahil sa pangyayari, 17 mga lumad at support
group ang nasugatan. Rhoderick Beñez
& Mark Anthony Pispis
0 comments:
Mag-post ng isang Komento