Proyektong kalsada ng GEM sa Midsayap, pinapurihan ng DPWH

(Midsayap, North Cotabato/May 9, 2012) ---Abot sa humigit kumulang sampung kilometrong sementadong daan ang ininspeksyon ngayong araw ng mga opisyal ng DPWH Cotabato Second District Engineering Office kasama ang mga kinatawan mula sa tanggapan ni Cong. Sacdalan, provincial government, contractors at Growth Equity for Mindanao o GEM.

Kaugnay nito, pinuri ng Department of Public Works and Highways o DPWH ang nasabing road concreting project ng GEM sa lugar, batay sa report ni PPALMA News Correspondent Roderick Bautista.

Ito ay dahil umano sa magandang performance hindi lamang ng GEM ngunit maging ng contractor na kinomisyon upang isakatuparan ang nasabing proyekto.

Ayon kay District Engineer Leonardo Martinez Jr., may mga nakita silang dapat pang ayusin kaugnay sa proyekto ngunit “minimal” lamang umano ang mga ito. 

Inihayag ng opisyal na sa kabuuan ay maganda ang performance ng GEM at ng contractor.

Binigyang- diin din ni Engr. Martinez na malaking kontribusyon sa tagumpay ng proyekto ang tuloy- tuloy na koordinasyon ng lokal na pamahalaan at iba pang concerned government agencies upang masolusyunan ang maliliit na isyu sa project area.

Nagbigay naman ng suhestiyon ang tanggapan ni North Cotabato First District Jesus Sacdalan na resolbahen sa pinaka-diplomatikong paraan ang anumang isyu, maliit man o malaki, sa pagpapatupad ng poyekto.

Magkakaroon naman umano ng diyalogo sa pagitan ng GEM, LGU, DPWH at mga recipient communities bago pormal na i-turn over ang proyekto.

Ang tinatayang 10-kilometer road project ng GEM sa Midsayap, North Cotabato ay nagsisimula sa Barangay Tumbras hanggang sa Barangay Olandang.