(Magpet, North Cotabato/May 10, 2012) --- Itinanggi
ng isang tribal community sa Barangay Kinarum ng Magpet, North Cotabato ang
paratang ng Philippine Army na umano lima sa kanilang mga miyembro ay mga
rebeldeng New Peoples’ Army o NPA.
Reaksyon ito ng tribal leaders sa pahayag ng
isang Sgt. Vigo ng 57th IB na nakabase sa Magpet na umano limang mga
Manuvu ang aktibo sa kilusang NPA sa kanilang lugar.
Tatlo raw sa kanila taga-Sitio Kirundung;
isa sa Sitio Angilo; at isa sa Sitio Labuhon.
Ginawa ni Sgt. Vigo ang pahayag, isang araw
makaraang atakehin sila ng mga rebeldeng NPA noong Sabado.
Noong Lunes, tinungo ng tribal leaders ang
opisina ni Barangay Kinarum chairman Danilo Lacia para igiit sa Army officer na
bawiin nito ang kanyang naging pahayag.
Agad na tinungo ni Kapitan Lacia ang
detachment ni Sgt. Vigo. Pero wala namang sagot ang Army officer sa panawagan
ng mga IP, ayon kay Lacia.
Matibay din ang paniniwala ni Kapitan Lacia
na walang NPA na nakatira sa kanyang barangay.
NOONG Sabado, bandang
alas-10 ng gabi, nilusob ng mga rebeldeng NPA ang outpost ng Army na nasa
sentro mismo ng Barangay Kinarum.
Tumagal nang halos 15 minuto ang palitan ng
putok.
Bagama’t walang nasugatan sa panig ng
mga sundalo at mga sibilyan, nagdulot naman ito ng pangamba sa mga residente ng
lugar, ayon kay Kapitan Lacia.
0 comments:
Mag-post ng isang Komento