4 na mga bahay sabay na ninakawan sa Kabacan; libung halaga natangay ng mga salarin

(Kabacan, North Cotabato/May 9, 2012) ---Patuloy ngayon ang ginagawang imbestigasyon ng mga otoridad sa nangyaring panloloob sa Hilario Compound, USM Avenue, Kabacan nitong umaga ng Lunes.

Batay sa report ng Kabacan PNP, pwersahang pinasok ng mga kawatan ang Strausel na tindahan ni Ginang Myla Catolico residente ng nabanggit na lugar sa pamamagitan ng pagtanggal ng bintana ng nasabing tindahan, tinangay ng mga magnanakaw ang isang pares ng sapatos na nagkakahalaga ng mahigit kumulang sa P6,000.00.

Ginamit ng mga magnanakaw ang likurang bahagi ng pintuan sa kanilang pagtakas.

Pinasok din ng mga di pa nakilalang salarin ang bahay na pag-mamay-ari ni Dante Hilario, 38 residente ng nabanggit na lugar kungsaan nilimas ng mga salarin ang cellphone ng mga katulong nito na nagkakahalaga ng mahigit kumulang sa P4,000.00.

Batay sa report nangyari ang insedente alas 5:00 ng umaga nitong Lunes, kungsaan pinasok ng mga suspek ang bahay nito sa pamamagitan ng slide window.

Narekober ng may-ari ng bahay ang isang pares ng tsinelas na posibleng naiwan ng mga salarin habang nagmamadaling tumakas papalayo mula sa Hilario compound.

Maliban sa nabanggit, nilooban din ang isa pang bahay ni Hilario na nasa nabanggit na compound kungsaan natangay ang wallet ng kanyang house boy na nakilalang si Rodel dela Cruz na naglalaman ng mahigit kumulang sa P2,200.00, mga litrato, resibo, Nokia Cellphone nito na nagkakahalaga ng P2,000.00, bag nito na naglalaman ng personal na mga gamit.

Madali umanong nakapasok ang mga salarin dahil nakalimutang i-lock ng nasabing house boy ang kanilang pintuan.

Samantala, isang araw bago nangyari ang insedente ay nilooban din ang bahay ni Aida Hilario ng mga salarin sa pamamagitan ng pagsira ng lock ng pintuan ng kanilang kwarto at natangay mula sa nag-uukupa ng nabanggit na bahay na si Rizza Silvan, 18, service crew ng pizza treat at residente ng Alamada, Cotabato ang abot sa P1, 253 na pera nito at cellphone ni Aling Hilario na nagkakahalaga ng P4,000.

Naniniwala naman si SPO1 Kenneth Garbin, investigator ng Kabacan PNP na posibleng iisang grupo lamang ang pumasok sa nasabing compound habang subject for manhunt na ng mga pulisya ang mga salarin. (Rhoderick Beñez)