(Mlang, North Cotabato/ April 21, 2014) ---Kahit
inulan tuloy tuloy pa rin ang pagdating ng mga mananampalatayang katoliko sa
Holy Cross shrine ng Nueva Vida M’lang Cotabato.
Ito’y matapos bumuhos ang malakas na ulan
bandang alas 5 ng hapon kahapon dahilan para maging maputik ang daan paakyat ng
bundok.
Bagamat marami ang naglakad, may mga iilan
pa ring motorista ang sumubok marating ang tuktok ng shrine gamit ang kanilang
mga sasakyan.
Pagdating sa unang istasyon ng krus,
mapapansin na agad ang dami ng mga nagbebenta sa gilid ng kalsada kung saan
halos doble na ang presyo kumpara sa baba.
May mga tindahan din sa mga susunod
na istasyon maging sa pinakatuktok ng bundok kung saan triple naman ang
presyohan ng mga bilihin.
Ayon sa mga nagbebenta, mahirap daw kasi ang pag
akyat sa mga paninda kaya’t nagtaas sila ng presyo, bagay na sinasang ayunan
naman ng mga mamimili.
Samantala, nagkalat naman ang mga tents sa paligid ng shrine na halos
wala ng mapaglagyan ang iba, meron ding nagtitiis na lamang sa mga talhib
makaupo lamang.
Naghanda naman ang pamunuan ng shrine ng llibreng film viewing
para sa lahat. Meron ding nakaantabay na medical team at mga nagpapatrolyang mga
pulis para sa seguridad ng mga deboto.
Mahigpit namang ipinagbabawal sa shrine
ang pagdadala ng mga lighters o posporo na pwedeng maging sanhi ng sunog dahil
na rin sa pinaliligiran ng talahib ang bundok.
Bawal din ang mga alak,
sigarilyo maging ang mga damit ng mga babae ay meron ding limitasyon.
Magtatagal ang ganitong sitwasyon hanggang
mamayang tanghali ayon sa isang deboto
na taon taong dumadayo sa shrine upang makapag nilay nilay at makapag
penitensiya bilang kabayaran sa kanyang mga kasalanan.
Magkakaroon din ng
parada ang mga deboto ngayong umaga bilang pag alala sa sinakripisyong buhay ni
Hesu Kristo dahil sa pagmamahal ng Diyos sa sangkatauhan. (RON PADOJINOG, DXVL
NEWS)
0 comments:
Mag-post ng isang Komento