“Grupong Muscuvado” sasabak sa Aliwan Fiesta 2014 sa Pasay City

MATALAM, Cotabato (Apr. 19) – Dala ang matinding deteminasyon at pag-asa, tumulak patungong Pasay City noong Sabado ang “Grupong Muscovado” ng Matalam High School upang lumahok sa isa sa pinakamalaking fiesta sa bansa – ang Aliwan Fiesta.

Kabilang sa “Grupong Muscovado” ang mahigit 100 contingents na binubuo ng mga cultural street dancers, drummers, trainers, mga guro at iba pang support group na sa loob ng mahigit dalawang buwan ay sumailalim sa masinsinang pagsasanay.

Ayon kay Ralph Ryan Rafael, Provincial Governor’s Office Media Affairs Focal Person at Overall Coordinator ng “Grupong Muscovado”, ipakikita ng grupo ang masaganang ani ng tubo at produktong asukal ng bayan ng Matalam tulad ng muscovado.

Ito ay sa pamamagitan ng sayaw kasabay ang pagpapakita ng angking yaman ng Kalivungan Festival o pagtitipon ng mga tribu na siya namang ipinagdiriwang sa tuwing sasapit ang anibesaryo ng lalawigan ng Cotabato.

Ayon pa kay Rafael, nais ipakita ng “Grupong Muscovado” ang kanilang kakayahan sa cultural street dancing at sisikaping makuha ang kampeonato ng Aliwan Festival 2014 sa April 24-26.

Nag-kampeon ang “Grupong Muscovado” ng Matalam High School sa Kalivungan Festival Street Dancing Competition noong 2013 at siyang naging pambato ng Cotabato province sa Sinulog Festival ng kaparehong taon.

Sinabi naman ni Ricky A. Dalida, Principal ng Matalam High School na malaki ang pasasalamat ng paaralan sa tiwala at suportang ipinagkaloob ni Cot. Gov. Emmylou “Lala” J. Taliño-Mendoza sa Grupong Muscovado. ‘

Naglaan ng sapat na pondo ang Provincial Government of Cotabato para sa rehearsals, travel, food at accommodation ng mga contingents, bagay na ipinagpasalamat ng pamunuan ng Matalam High School.

Sumuporta din sina Matalam Mayor Oscar Valdevieso at Board Member Maybelle Valdevieso sa Grupong Muscovado na ayon sa kanila ay tunay na karangalan para sa Matalam.

Maging mga magulang ay tuwang-tuwa sa pagsabak ng kanilang mga anak sa Aliwan Fiesta kasabay ang pasasalamat sa mga opisyal ng pamahalaang panlalawigan sa tiwala at suporta sa Grupong Muscovado. (JIMMY STA. CRUZ/PGO Media Center)