Listahan ng mga bagong iskolars, ipinalabas ng tanggapan ni Cong. Sacdalan

(Midsayap, North Cotabato/May 10, 2012) ---Matapos ang final screening at orientation noong Sabado, May 5 ng taong kasalukuyan sa CJNS Kapayapaan Hall sa Midsayap, inilabas na ng district office ni North Cotabato First District Cong. Jesus Sacdalan ang opisyal na listahan ng mga bagong iskolars nito para sa darating na pagbubukas ng klase sa Hunyo.

Abot sa 40 bagong iskolars ang pumasa sa ginawang screening upang mapabilang sa education support program ni Cong. Sacdalan na Edukasyon para sa Kapayaan- Priority Development Assistance Fund Scholarship Program.

Inaasahang kukuha ng agriculture related courses sa USM o University of Southern Mindanao sa bayan ng Kabacan, North Cotabato ang mga pumasang aplikante.

Ayon kay First Congressional District Office Scholarship Coordinator Nicanor Nanlabi, patuloy ang pakikipag- ugnayan ni Cong. Sacdalan sa USM dahil naniniwala ito sa kakayahan ng pamantasang hubugin ang angking kaalaman ng mga iskolars.

Dagdag ng opisyal, prayoridad din umano ang mga kursong may kaugnayan sa agrikultura dahil nais ng kongresista ng unang distrito ng Cotabato na magkaroon ng mga iskolar na makapagbibigay kontribusyon sa ginagawang inisyatibo ng pamahalaan upang makamit ang food self- sufficiency sa bansa.

Pormal na ring isinumite ang nasabing list of qualified scholars sa Office of Student Affairs sa USM na siyang gagabay sa mga iskolars ngayong enrolment period.

Ito na ang second batch ng mga iskolars na sinusuportahan sa ilalim ng PDAF ni Cong. Sacdalan. (Roderick Bautista)