Armalite rifle, narekober sa isang abandonadong sasakyan sa kidapawan city

(Kidapawan City/May 2, 2012) ---Narekober ang isang M16 armalite rifle sa isang inabandonang sasakyan na nakaparada sa gilid ng National Highway sa Kidapawan city dakong alas 7:00 ng gabi, kamakalawa.

Ayon kay Supt. Renante Cabico, City Police Director ng nasabing lungsod, isang Jun Obello na tauhan ni Cotabato 2^nd district Representative Nancy Catamco ang nagpakilalang may ari ng nasabing long firearm.

Aniya, ang nasabing armas ay inisyu sa kanya ng isang pulitiko sa North Cotabato.

Pero ng hanapan ng mga otoridad ng permit to carry si Obello, bigo itong makapresenta at sa huli, inamin nito sa mga pulis na ang naturang baril ay ipinagkaloob sa security escort ni Congresswoman Catamco.

Dahil nga sa walang maipakitang kaukulang papeles si Obello, inilagay ngayon sa kustodiya ng Kidapawan city PNP ang naturang armas.

Magsasampa naman ng kaso ang mga otoridad kung di makapagpakita ng kaukulang dokumento ang opisyal.

Sinabi ni Obello na ang nasabing armas ay naka-assigned sa isang Sgt. Rolando Talandron, squad leader ng 57^th Infantry Battalion, PA na siyang nakadestino na security escort ni Rep. Catamco.

Kahapon ng umaga, dinala ni Talandron ang acknowledgement receipt, kungsaan nakasaad na ang M16 armalite rifle na may serial number 08493 ay inisyu sa kanya ni Lt. Col. Noel dela Cruz, acting commanding officer of the 57^th IB, na may petsang January 20, 2012.