Kasong isinampa laban sa kidnap leader na si Lastikman; idinismiss ng hukuman

(Midsayap, North Cotabato/May 4, 2012) ---Dismayado ang isang mataas na opisyal ng pulisya sa North Cotabato makaraang madismiss ang kasong isinampa laban kay Datukan Samad o mas kilala sa ‘Lastikman’, inmate sa Kidapawan City Jail na tangkang i-rescue at patakasin sana noong Pebrero 19 matapos atakihen ng may mahigit sa 30 armado ang nasabing kulungan na nagresulta sa pagkamatay ng tatlo katao at ikinasugat ng 17 iba pa.

Isinisi ni Sr. Supt. Cornelio Salinas, provincial director ng North Cotabato PNP, ang pagkakadismiss sa kaso ni “Lastikman” dahil sa malamig umano ang mga testigo na ipagpatuloy ang nasabing kaso.

Ayon sa report, nadismiss ang kaso nitong kidnapping for ransom at robbery-in-ban nitong nakaraang linggo sa Regional Trial Court (RTC)sa Midsayap, North Cotabato.

Ang nasabing kaso ay isinampa kontra kay lastikman ng Pikit PNP noong 2007.

Ang pagkakadismiss ng kaso ni Lastikman ay kinumpirma rin ni Kidapawan City Mayor Rodolfo Gantuangco matapos na binantaan umano ng grupo ni “Lastikman” ang huwes na may hawak ng kaso nito.

Sa kabila ng pagkakadismiss ng kaso ni Lastikman, positibo naman si Sr. Insp. Elias Dandan, hepe ng Pikit PNP, na mabuksan muli ang kaso nito sa lalong madaling panahon at mapanagot sa mga kasong kinakaharap nito.

Kung matatandaan, nitong Pebrero 19, 30 mga armadong kalalakihan ang umatake sa City Jail ng kidapawan upang tangkang patakasin si Lastikman.

Pinasabugan ngmga ito ang dalawang rocket-propelled grenades ang city jail at pinaulanan ng M14 armalite rifles na naging dahilan ng palitan ng putok sa panig ng mga armadong grupo at mga jail guards sa lugar.

Bagama’t bigong mapatakas ng mga ito ang target, pinasabugan nila ang lugar gamit ang Improvised Explosive Device na gawa sa 81-mm na naging dahilan ng pagkamatay ng Red Cross volunteers at dalawang bystanders sa lugar at magkakasugat ng maraming iba pa. (Rhoderick Beñez)