(Midsayap, North Cotabato/ May 2, 2014) ---Naghain
ngayon ng tatlong resolusyon si Board Member Shirlyn Macasarte Villanueva sa
Sangguniang Panlalawigan upang siyasatin ang napakahabang brownout sa PPALMA
Area.
 |
| Photo by: Karl Ballentes |
Ito ang sinabi ng opisyal sa DXVL News
kahapon kasabay ng isinagawang kilos protesta sa bayan ng Midsayap upang
papaliwanagin ang Cotabato Electric Cooperative o Cotelco-PPALMA sa mahabang
brownout sa lugar.
Ayon sa opisyal, nais nitong alamin sa
pamamagitan ng National Grid Corporation of the Philippines o NGCP kung ilang
megawatts ang sinusupply nilang kuryente sa Cotelco at ang dahilan ng brownout
bukod pa sa ipinapatupad na load curtailment ng NGCP.
Ito upang malaman nila kung nagsasabi ng
totoo ang Cotelco-PPALMA, ayon kay Macasarte.
Maliban dito, naghain naman ng resolusyon
ang lokal na mambabatas na papaliwanagin ang Cotelco-PPALMA sa napakahabang oras na brownout
na ayon sa opisyal ay umaabot na ngayon sa 8-10 oras na power interruption.
Nais din nitong busisiin kungsaan napunta
ang 2megawatts na standby generator na una ng ipinangako ng Cotelco-PPALMA noong
2013.
Pangatlo sa mga inihaing resolusyon ng
opisyal ay ang paghingi ng audited financial statement upang mabatid ang status
ng kooperatiba.
Sa ngayon, ayon kay Macasarte, kung di ito
matutugunan ay posibleng mamamatay ang ekonomiya sa PPALMA dahil lahat ng mga
kinikita ng mga negosyante ay napupunta lamang sa pambili ng gasolina para sa
operasyon ng negosyo.
Si Macasarte, ay isa lamang sa libu-libong
mga mamamayan na nagdamit ng kulay itim na nagsagawa ng kilos protesta sa
Midsayap, upang papaliwanagin ang Cotelco PPALMA sa nasabing krisis sa
enerhiya. Rhoderick Beñez
0 comments:
Mag-post ng isang Komento