Search and Rescue Operation sa 1 pang nalunod na grade 5 pupil, magpapatuloy ngayong araw

(Kabacan, North Cotabato/ July 25, 2013) ---Nagpapatuloy na sa mga oras na ito ang search and retrieval operation ng Kabacan Rescue Team ng Disaster Risk Reduction Management Council sa Kabacan river matapos na missing pa rin kahapon sa isinagawang paggalugad ng MDRRM ang isa pang grade 5 pupil matapos na malunod sa Kabacan river, na itinuturing na killer river.

Ayon kay MDRRMC Officer David Don Saure, pansamantala nilang inihinto ang search and rescue operation alas 6:30 kagabi dahil sa madilim na ang paligid.

Batay sa report, pasado alas tres kahapon ng hapon ng nagsisigaw ang isa sa dalawang paslit na nakilalang si Monica Martinez, 10, residente ng Mapanao St. mula sa pampang ng Kabacan river na nasa loob ng USM compound.

Maswerte namang nakita siya ng ilang estudyante ng USM at agad na tinungo ang kinaroroonan nito.

Dito nalaman ang sinapit ng dalawa kaya minabuti na lamang ng mga nakakitang estudyante na dalhin si Monica sa USM Hospital.

Sa salaysay ni Monica, nagkayayaan silang maligo ng kaklaseng si Joelina Umali, 11, residente ng Purok Miracle ng baying ito.

Ayon sa kanya siya umano ang muntik ng lamunin ng tubig at tinulungan lamang siya ni Joelina na siya namang minalas na mahulog at hanggang kahapon ay di pa ito natagpuan.

Sa Panayam ng DXVL News kay MDRRM Officer David Don Saure, posibleng wala ng buhay ang bata kung makita na ito sapagkat malalim ang Kabacan river at medyo malakas ang agos ng tubig ditto, pero hanggat di pa nakita ang bangkay nito, umaasa pa rin silang ligtas pa ito.

Nananawagan ngayon sa publiko si MDRRMC Officer David Don Saure, partikular na sa mga magulang na ang bahay ay malapit sa tabing ilog na wag hayaan ang inyung mga anak na maglaro sa ilog.

Ginawa ng opisyal ang pahayag sa DXVL News, matapos ang report na pagkakalunod ng isang grade 5 pupils sa Kabacan river.

Aniya, sa kasalukuyan ay malalim ang Kabacan river bukod pa sa malakas ang agos nito.

Marami rin umanong ugat ng kahoy na magiging pahirapan para sa pag-ahon sa mga ito.

Hinikaya’t din nito ang publiko at ang mga residente na malapit sa tabing ilog na kung lumutang ang bangkay ng biktima ay agad ireport sa kanilang sa 0947-425-7020.

Samantala, bago nangyari ang insedente kahapon, sinabi ni Kabacan Pilot Central Elementary School Principal Annie Roliga na pumasok pa kahapon ng umaga si Joelina Umali pero agad na umuwi ng kanilang bahay pagkatapos ng klase nila, pero si Monica Martinez naman ay noong July 17 pa huling pumasok ang nasabing estudyante.

Parati umanong nagkakasakit si Martinez dahilan ng madalas nitong pagliban sa klase, ayon sa principal.

Si Umali naman ay walang ng Ina at ang tatay nito ay sa Gensan nagtatrabaho at ang lola niya lamang ang kasama niya sa kanilang bahay.

Dahil sa nakakalungkot na pangyayari, nagpaalala ang punong guro sa mga estudyante na kung uwian na agad na diritso ng bahay at sa mga magulang naman ay dapat ding gabayan ang inyung mga anak. (Rhoderick Beñez)