HRMO ng USM, sugatan sa pamamaril

(Kabacan, North Cotabato/ June 17, 2013) ---Sugatan ang Human Resources Management Director ng University of Southern Mindanao makaraang pagbabarilin ng mga di pa nakilalang suspek sa may Uyangurine St., Poblacion, Matalam, Cotabato alas 6:40 kagabi.

Kinilala ng Matalam PNP ang biktima na si Dr. Cynthia Alpas, 45-anyos at residente ng nabanggit na lugar.

Batay sa inisyal na report ni SP01 Froilan Gravidez ng Matalam PNP habang nagtetext umano ang biktima sa loob ng kanyang sasakyan na Mitsubishi  adventure kulay berder at may plate number ZGD 481 na nakaparada sa loob ng kanilang compound ng pagbabarilin si Dr. Alpas ng dalawang beses ng mga di pa nakilalang mga salarin sa harap ng gate ng kanilang bahay.

Nagtamo ang biktima ng isang tama ng bala sa kaliwang baiwang nito. 

Narekober sa crime scene ang isang basyo ng .45 na pistola na ginamit sa nasabing pamamaril.

Sa report ni PCI Elias Dandan, hepe ng Matalam PNP nasa mabuti na umanong kondisyon ang biktima kagabi ng isinugod sa ICU ng Kidapawan Medical Specialist.

Iniimbestigahan pa ngayon ng mga pulisya kung anu ang motibo sa nasabing pamamaril.

Nitong Sabado ng gabi, sinunog ng mga di pa nakilalang mga salarin ang Toyota Furtuner ni Director Orlando Forro ng Physical Plant Services at dating USM Security Services and Management habang nakaparada ito sa kanilang bahay.

Sunog ang likurang bahagi ng kanyang sasakyan.

Nagkakahalaga ang nasabing sasakyan ng abot sa higit P1M.

Inaalam pa ngayon ng mga otoridad kung may kaugnayan ang nasabing pangyayari sa gusot sa USM. (Rhoderick Beñez)