Operasyon ng USM, balik normal na

(Kabacan, North Cotabato/ June 18, 2013) ---Matapos ang ilang araw na paralisado ang operasyon ng University of Southern Mindanao o USM Main campus.

Balik na ngayon sa normal ang sitwasyon ng paaralan.

Kahapon ng umaga tinungo ni Cotabato Gov. Emmylou “Lala” Talino Mendoza ang ceremonial opening ng USM Main gate bilang hudyat ng nalagpasan ng institusyon ang krisis na kinakaharap nito.

Matapos ang maikling programa, agad na pinulong ng gobernadora ang mga raliyesta kasama ang alkalde ng Buluan na si Mayor Jung Magudadatu.

Kabilang sa tinalakay ay ang mga hakbang na kanilang gagawin sa loob ng 29 na araw upang mapadali ang mga kasong isinampa ng mga ito kontra kay USM Pres. Derije.

Suportado naman umano ni Board Member Dulia Sultan sa Sangguniang Panlalawigan ang resolusyon na kanilang ihahain batay naman sa panawagan ng mga gurong raliyesta at estudyante.

kahapon binabalangkas na nila ang nasabing resolusyon upang maisalang na ito ngayong araw sa deliberasyon sa Sangguniang Panlalawigan, ayon sa report.

Pero ayon sa gobernadora kapwa mananagot ang mga raliyesta sa pagkakabalam ng klase sa Pamantasan at mananagot din ang Pangulo sa mga ibinabatong aligasyon laban sa kanya.

Tinukoy pa ng gobernadora na paiimbestigahan nito ang magkahiwalay na insedente ng panununog sa sasakyan ni Director Orlando Forro at pamamaril kay HRMO Director Dr. Cynthia Alpas.

Ayon sa pinakahuling report na nakalap ng DXVL News, si Dr. Alpas ay nasa mabuti na umanong kalagayan habang patuloy na nagpapagaling ngayon sa Kidapawan Medical Specialist Center. (Rhoderick Beñez)