Grupong Gabriela Youth sa North Cotabato, dismayado sa pagtatapos ng International Women’s Month

(Kabacan, North Cotabato/March 31, 2012) ---Dismayado ang progresibong grupo ng mga kabataang kababaihan sa pagtatapos ng makasaysayang paggunita sa pandaigdigang buwan ng mga kababaihan.

Mariing ipinahayag ng grupo ang kanilang mahigpit na pagkadismaya sa kasalukuyang administrasyon sa sunod-sunod na pagtaas ng mga presyo ng mga bilihin at presyong petrolyo nitong mga nagdaang linggo.   

Magtatapos na diumano ang paggunita sa makasaysayang Pandaigdigang buwan ng mga kababaihan subalit lumalala ang krisis at kahirapan ang kinakaharap ng mga kababaihan maging ang sambayanan sa kasalukuyan.

Ayon kay Jenifer Cardo, tagapagsalita ng Gabriela youth-North Cotabato sa kasalukuyan, madilim diumano ang kinabukasan ng mga kabataang kababaihan dahil sa tumitinding kahirapan, kahit mismo ang mga sariling laman ay ikinakalakal dahil sa napakataas na halaga ng mga serbisyong panlipunan partikular ang edukasyon sa ating lipunan na patuloy na tinatapyasan ng pondo ng kasalukuyang gubyerno.

Sa kabilang dako, iginiit naman ni John Rey Onting ng Progressive Gay of the Philippines International (ProGay)-Kabacan  ang kanilang pagkadismaya sa patuloy na paninikil sa karapatan ng mga kabaklaan sa lipunan.

Aniya, isang tanda lamang ng mga kababaihan ang diskriminasyon sa mga kabaklaan kung kaya’t ang  nararanasang diskriminasyon sa mga kababaihan ay tinatamasa rin ng mga kabaklaan.

Nakatakdang lalahok ang mga progresibong grupo ng mga kabataan sa isasagawang lakbayan sa zamboanga city upang salubungin ng malawak na pagkilos ang pagdating ng mga amerikanong sundalo sa bansa.