Cholera Outbreak sa Alamada; 10 na patay, rehabilitation ng mga pipe lines at water reservoir, isinasagawa na!

(Alamada, North Cotabato/ May 23, 2014) ---Pumalo na sa sampu ang namatay dahil sa cholera outbreak sa bayan ng Alamada, North Cotabato.

Ito na napag-alaman kay Alamada Municipal Administrator Ruben Cadava sa panayam sa kanya ng DXVL News kahapon.

Kinilala ang pinakahuling nasawi na si Kalima Ricor Kalo, 47 na nasawi sa sitio Mimbalawag, Brgy. Dado sa bayan ng Alamada.

Sinabi ng opisyal na hindi na umano naisugod pa ang biktima sa bahay pagamutan dahil sa may kalayuan ang lugar makaraang dumaranas din ng pananakit ng tiyan at pagtatae ang biktima.

Bukod dito bagama’t hindi kumpirmado, may nakuha din silang report na isa pang biktima ng cholera outbreak na nasa Regional Hospital sa Cotabato City na binawian ng buhay habang ginagamot.

"Nagsasagawa na ngayon ng rehabilitation sa mga pipe line at mga water reservoir na pinagkukunan ng mga residente na naapektuhan ng outbreak at massive information campaign sa mga residente dito katuwang ang LGU Alamada at Provincial government at iba pang sektor", wika pa ni Cadava.

Bukod dito sinabi ni Cadava na nagkakaroon na rin ng massive chlorinization sa mga naapektuhang lugar at patuloy ang education at awareness campaign. Rhoderick Beñez