(Kabacan, North Cotabato/ March 12, 2014)Inihayag
ni Cotabato Governor Emmylou “Lala” Taliño Mendoza na may programa ang National
Government para tugunan ang kakulangan ng kuryente sa Mindanao.
Ginawa ng gobernadora ang pahayag sa eksklusibong
panayam sa kanya ng DXVL News kahapon kungsaan sinabi nitong wala itong
kinalaman sa pag-apruba ng Department of Energy sa Geothermal Exploration
Project ng Aboitiz sa Barangay Manobo, Magpet, North Cotabato.
Giit pa ni Gov. Mendoza na may otoridad ang
National Government na magbibigay ng tatlong taon na contract of service sa
kompanya ng Aboitiz para masubukan ang kanilang negosyo.
Magbibigay din ng pag-indorso ang provincial
government kung matutugunan ng kompanya ang mga inilatag na kasunduan dito na
isasalang sa Sangguniang Panlalawigan.
Dagdag pa ni Mendoza, bagama’t nahaharap ang
probinsya sa suliranin ng kakulangan ng suplay ng kuryente, dapat din umanong
isaalang-alang ang kapakanan ng mga residenteng maapektuhan.
Samantala, kung papasok ang bagong planta sa
probinsiya, sisiguraduhin nitong ang pangangailangan ng North Cotabato sa
kuryente ay magiging prayoridad.
Dapat din na mabigyan ng special price ang
probinsiya dahil sa magiging source o host ito ng generation ng elektrisidad.
Maliban dito, sinabi ng gobernador na dapat
ay pagtuunan din ng pansin ng aboitiz ang kanilang social responsibility sa
komunidad, na dapat maprotektahan ang mga tao at ang kapaligiran at maging ang
paraan ng pagbayad sa buwis. Rhoderick
Beñez
0 comments:
Mag-post ng isang Komento