2 mga lugar sa Kidapawan City, isinailalim sa fogging operation kontra dengue

(Kidapawan city/ March 6, 2014) ---Isinailalim sa fogging operations ng pinagsanib na pwersa ng City Disaster Risk Reduction and Management Office at City Health Office ang ilang lugar na sakop ng Talisay at Alim Street sa Poblacion ng Kidapawan kamakalawa.

Sa bisa ng utos ni City Mayor Joseph Evangelista, isinagawa ang operasyong nabanggit kontra paglaganap ng dengue virus na dala ng kagat ng lamok.

Ikinabalaha ng alkalde ang naitalang apatnapung kaso ng dengue sa lungsod mula Enero hanggang buwang kasalukuyan.

Isa ang naitalang fatality sa komplikasyong dulot ng dengue, ayon na rin sa ulat ng City Health Office.

Umano ay sa bisinidad ng Talisay street nanuluyan ang 25 taong gulang na empleyada ng isang department store sa lungsod na namatay sa komplikasyong dulot ng dengue matapos itong makagat ng lamok na carrier ng dengue virus.

Maaga pa lang ay ginalugad na ng mga kawani ng CDRRMO at CHO ang mga nabanggit na lugar saka isinagawa ang operation gamit ang mga fogging machines ng una.

Nagbigay abiso muna si Mayor Evangelista sa mga purok leaders ng lugar bago gawin ang fogging operations.

Dahil dito ay patuloy naman ang panawagan sa lahat na maging mapagmatyag sa pagkalat ng dengue virus. Payo ng mga otoridad na panatilihing malinis ang mga komunidad at tahanan sa lahat ng oras upang hindi pamugaran ng mga lamok na nagdadala ng sakit.