(Arakan, North Cotabato/
May 3, 2013) ---Dinukot ng mga pinaniniwalaang 50 armadong rebeldeng grupo ang
isang kasapi ng Civilian Auxiliary Army o CAA sa isang remote na brgy. sa bayan
ng Arakan, North Cotabato kahapon ng umaga.
Kinilala ni 57th
IB Civil military Lt. Nasrullah Sema ang biktima na si Hilario Cambel, dating
kasapi ng para-military group sa ilalim ng 38th IB at residente ng
Barangay Kabalantian, Arakan.
Sa inisyal na
imbestigasyon, pwersahang kinuha ang biktima sa bahay nito alas 5:00 ng
madaling araw kahapon ng mga grupo ng Front Guerilla 53 sa ilalim ng pamumuno ni
Kumander Jasmin.
Ang grupo ni Jasmin ay
mga pinaniniwalaang mga NPA na may operasyon sa mga bayan ng Arakan, Antipas at
Pres. Roxas sa ilalim ng Southern Mindanao Regional Command.
Makaraan ng limang oras,
pinalaya naman si Cambel ng kanyang mga abductors, pero kinuha ng mga rebelde ang
kanyang kalibre .45 na pistol.
Bukod sa nabanggit,
tinangay din ng mga ito ang maraming sako ng palay mula sa mga bahay ng mga
residente doon at isinakay sa isang dump truck papunta sa Brgy. White Kulaman
sa kalapit na probinsiya ng Bukidnon.
Agad namang kinondena ni
Sema ang ginawang pagnanakaw ng mga rebeldeng grupo sa mga palay ng mga
residente.
Ito na ang pangalawang
abduction ang naitala simula buwan ng Abril ang una ay ang kaso ni PO2 Mike Ali
ng Pres. Roxas kungsaan dinukot din ng mga pinaniniwalaang NPA ang nasabing
pulis noong Abril 19. (Rhoderick Beñez)
0 comments:
Mag-post ng isang Komento