“Black Propaganda, wag magpadala” –Cong. Catamco

(Kidapawan City/ April 29, 2013) ---Tinawag ngayong black propaganda ni 2^nd District Representative Nancy Catamco ang mga lumalabas na paninira laban sa kanya at iginiit nitong walang katotohanan ang mga paratang ng mga kalaban nito sa pulitika.

Ito ang naging reaksiyon ng kongresista makaraang lumabas ang mga kumakalat na posters na kaalyado na umano nito si dating Governor Manny Piñol na ngayon ay tumatakbo bilang gobernador sa probinsiya sa ilalim ng Nationalist People’s Coalition o NPC.

Nabatid na si Catamco ay tumatakbo sa ikalawang termino bilang kongresista sa ikalawang distrito ng North Cotabato sa ilalim ng Liberal Party.

Aniya, paninira lamang ito sa kanyang liderato at sa kredibilidad niya bilang boses ng taong bayan sa distrito dos ng North Cotabato sa kongreso.

Sinabi ni Catamco na tapat pa rin siya sa kanyang kinasasanibang partidong Liberal at si incumbent Gov. Lala Mendoza pa rin ang sinusuportahang nitong gobernador.

Hinamon din ng kongresista ang mga kalaban nito sa pulitika na ilabas na nila ang kanilang tangkang pasabog na isyu kontra sa kanyang kampo para agad nitong masagot.

Kumpiyansa ang opisyal na naging tapat ang kanyang pagserbisyo sa taong bayan.

Aminado rin ang opisyal na dahil sa mga ibinubuhos nitong proyekto sa lahat ng mga barangay na nasasakupan nito ang dahilan din kung bakit marami ang bumubuhos na tao sa kanyang mga campaign sorties. (Rhoderick Beñez)