Ilang mga pamilyang apektado ng pagbaha sa bayan ng Kabacan, unti-unti ng nagsibalikan sa kanilang mga tahanan; mga naapektuhan ng pagbaha sumampa na sa 4 na libung pamilya

(Kabacan, North Cotabato/ February 26, 2013) ---Bagama’t humupa na ang mga pag-ulan na nagresulta ng pagbaha at pag-apaw ng Pulangi river at ilan pang mga ilog na nakapaligid sa bayan, umakyat na ngayon sa mahigit sa apat na libung mga pamilya ang kabuuang apektado ng pagbahay sa bayan ng Kabacan.

Ito ang nabatid mula kay Social Welfare Officer Susan Macalipat sa pinakahuling data na nakalap kahapon ng DXVL News.

Sinabi pa ni Macalipat na abot na rin sa 11 mga barangay ang naapektuhan ng mga pagbaha.

Tinukoy ng opisyal ang mga barangay na matinding tinamaan ng mga pagbaha ay kinabibilangan ng Brgy. Kayaga, Salapungan, Pedtad, Buluan, Nangaan, Magatos, Cuyapon, Simone, Simbuhay, Lower Paatan, at Kilagasan.

Tinataya ding nasa apat na libu isang raan walumpo’t tatlong pamilya ang apektado ng pagbaha sa mga naturang barangay dahil sa pag apaw ng pulangi river.

Sa ngayon tumigil na sa pag apaw ang pulangi river at may mga pamilya na ang kasalukuyang nagsisipagbalikan sa kani-kanilang mga tahanan maliban na lang ang mga pamilya na mula sa Brgy. Cuyapon na labis na napinsala ng naturang pagbaha.

Kaagapay ang MSWDO ng Kabacan patuloy pa ring tinututukan ng Municipal Disaster Risk Reduction Management (MDRRM) ang naturang pangyayari. (Cheremel Paguital)