Passenger Van, hinold-up sa Matalam-Kidapawan Highway; mga personal na gamit, cash at alahas natangay ng mga suspek

(Kabacan, North Cotabato/June 20, 2012) ---Natangay ng mga hold-apers ang mga cash, alahas at iba pang mga personal na gamit ng mga pasahero ng Van makaraang ma-hold-up ang mga ito sa Kidapawan-Matalam highway nitong Lunes.

Ayon kay Police chief Inspector Jordine Maribojo, kasama sa mga tinangay din nila ang Van kungsaan ginamit nilang get away vehicle matapos iwanan ang mga biktima sa isang masukal na lugar sa bayan ng Carmen.

Kinilala ni Maribojo ang driver ng kulay putting D4D na may plate number na MVZ 726 na Van na si Virgilio Ignacio na biyahe buhat ditto sa bayan ng Kabacan papunta ng Davao City ng parahin ng tatlong mga armadong kalalakihan alas 8:30 ng gabi nitong Lunes.

Pagdating ng Van sa Bureau of Plant Industry (BPI) provincial office na nasa National highway ng Barangay Amas dalawa pang mga lalaki ang sumakay sa nasabing Van.

Makalipas ang ilang sandali agad na nagdeklara ng hold-up ang mga salarin kungsaan isa sa kanila nakatutok ng baril sa driver at mga pasahero habang abala naman ang isa pa sa pagkuha ngmga gamit ng mga pasahero.

Piniringan umano ng mga suspek ang mga pasahero at pinahubad nila ang apat na mga lalaking pasahero para kunin ang t-shirts at pantaloon nila.

Dinala ang mga ito sa Barangay Kibayao sa bayan ng Carmen town at pinatakas kungsaan nakahingi sila ng saklolo sa detachment ng Bravo Company ng 7^th Infantry Battalion na nasa Barangay Nasapian sa nabanggit na bayan.

Sa ngayon di pa matuloy ng mga otoridad kung anung grupo ang may kagagawan ng panibagong pang-hohold-up sa highway ng North Cotabato. (Rhoderick Beñez)