Task Force Kabacan, ilalagay matapos ang sunod-sunod na pamomomba sa bayan

(Kabacan, North Cotabato/ November 16, 2015) ---Aprubado na kay Kabacan Mayor Herlo Guzman Jr. at P/SSupt. Alexander Tagum, Provincial Director ng Cotabato Police Provincial Office ang paglalagay ng ‘Task Force Kabacan’.

Ito ang ibinunyag ni PSI Ronnie Cordero, pinuno ng Kabacan PNP matapos ang sunod-sunod na panghahagis ng garanada sa Kabacan.

Matatandaan na sugatan ang lima katao sa panghahagis ng granada sa panulukan ng Malvar Street at Rizal Street National Highway sa Poblacion, Kabacan, Cotabato alas 6:30 noong Sabado ng gabi.

Kinilala ni PSI Ronnie Cordero, hepe ng Kabacan PNP ang mga bikitma na sina: Berlie Baluyot, 46 taong gulang, may asawa, residente ng Doña Aurora Street, Kabacan na tinamaan sa kanyang kaliwang binti; Rosalie Pareñas, 36 taong gulang, residente ng Brgy. Bannawag, Kabacan na tinamaan sa kanyang ulo; John Clark Mantilla Opena, 13 taong gulang residente ng Roxas Street, Kabacan na tinamaan sa kanyang kaliwang paa; Gerardo Ombrete Moya, 48 taong gulang, may asawa, residente ng Maria Clara Street, Poblacion Kabacan na tinaamaan sa kanyang kanang dibdib at si Johainna Pops Suelo Alon, 17 taong gulang, residente ng Quirino street, Poblacion Kabacan.

Ayon kay Cordero, mga riding criminals ang mga responsable sa panghahagis ng granada na mabilis namang tumakas sa di malamang direksiyon.

Matatandaan na noong Nobyembre a-11, isang batang paslit din ang sugatan sa inihagis na granada sa harap ng Rock Oil Gasoline Station sa Brgy. Kayaga sa bayan ng Kabacan.

Dahil dito, malaking tulong ang paglalagay ng ‘Task Force Kabacan’ para ma-augment ang karagdagang pwersa ng pulsiya sa bayan ng Kabacan. Rhoderick Beñez