By:
Mark Anthony Pispis
(Kabacan, North Cotabato/ February
26, 2015) --- Mabiyayaan ng pailaw ang Brgy. Tamped sa bayan ng Kabacan matapos
na mabibigyan ang mga ito ng 291 Solar Panels na libreng ilalagay sa nasabing
lugar buhat sa Department of Energy.
Ayon kay USM-Affiliated Renewable
Energy Center Technical Division Head Engr. Arnulfo Ocreto sa panayam ng DXVL
News na anumang araw simula ngayon ay kanila ng ilalagay ang nasabing kagamitan
sa Brgy. Tamped.
Paliwanag ni Engr. Ocreto na kanila
na lamang hinihintay ang mga technicians na maglalagay ng solar panels.
Aniya, kabilang sa mga ipapamahaging
solar panels ang 3 watt na Light Igniting Diode o LED, isang 1 watt LED na ilaw
na pwedeng pailawin magdamagan na maganda para sa mga bata o residente na hindi
makatulog na walang ilaw, isang yunit ng radio na may AM-FM at charging outlet
para sa mga cellphones at iba pang mga kagamitan.
Dagdag pa ng opisyal, napakalaking
tulong umano nito sa mga residente ng Brgy. Tamped sapagkat di umano ito
naaabot ng serbisyo ng Cotelco.
Maliban dito, mahirap din kasi ang transportasyon
sa nasabing Barangay.
Una na ring tinungo ng grupo ng AREC
ang Brgy. Tamped upang isagawa ang social preparation o ang pagbibigay
impormasiyon sa mga residente.
Sa hiwalay na panayam ng DXVL News
kay LGU Kabacan Administrator Ben Guzman, ang nasabing proyekto ay
naisakatuparan dahil sa pakikipagtulungan ng Department o Energy (DoE), Local
Government Unit of Kabacan sa pangunguna ni Kabacan Mayor Herlo Guzman Jr., at
ng USM-AREC sa deriktiba ni USM Pres. Dr. Francisco Gil Garcia. Rhoderick Beñez
0 comments:
Mag-post ng isang Komento