Ilang paaralan sa mga baranggay sa Pikit na apektado ng kaguluhan suspendido ang klase

(Pikit, North Cotabato/ February 24, 2015) ---Nag suspende ng klase ang ilang mga paaralan sa mga baranggay sa bayan ng Pikit na apektado ng kaguluhan sa pagitan ng Moro Islamic Liberation Front o MILF at Bangsamoro Islamic Freedom Fighters o BIFF. 

Ito ang inihayag ni Cotabato Schools Division Superintendent Omar Obas sa panayam ng DXVL news.

Inihayag din niya na abot humigit kumulang dalawang libo at limang daang estudyante ang apektado ng kaguluhan mula sa dalawang secondary schools at anim na paaralang elementarya. 

Aniya ang iba umano ay noong nakaraang Lunes pa at Biyernes nagsuspendi ng klase.

Dagdag pa niya na ang mga estudyante ay kasalukuyang nasa mga evacuation center at ang mga guro partikular na sa Pikit West at Pikit South district ay patuloy na pumupunta sa mga evacuation center upang bigyan ang mga estudyante na nabiktima ng kaguluhan ng social at psychosocial therapy tulad ng paunang lunas, feeding program, play therapy at iba pang intervention upang di masyadong maapektuhan ang kanilang pagkatao at pag aaral. 

Ang naturang hakbang ay alinsunod din umano sa patnubay ni Cotabato Gov.Lala Taliño Mendoza na mabigyan ng edukasyon ang mga kabataan kahit na nasa evacuation center.

Samantala, pinabulaanan naman ni Obas ang report na may mga estudyanteng di pumapasok sa eskwelahan dahil umanib sa rebeldeng grupo. Aniya, wala silang natatanggap na report.

 Kapag may mga kaguluhan umano ay talagang bumababa ang attendance sa mga paaralan  dahil di pinapapasok ng mga magulang ang mga anak para sa seguridad ng mga ito.

Nagbigay din si Obas ng payo sa mga guro lalong lalo na sa mga guro na nagtuturo sa mga paaralan na apektado ng kaguluhan na patuloy pa ring puntahan ang mga estudyante kahit na nasa evacuation center upang maramdaman ng mga ito ang pagkalinga at patuloy na pagbibigay ng serbisyo. Naki usap din siya sa mga estudyante at mga magulang na makipagtulungan sa mga guro. Christine Limos