WFP Country Director for Asia Kenro Ashidara natuwa sa mahusay na fish pen project sa Pikit, Cot

Written by: Jimmy Sta. Cruz

(Amas, Kidapawan City/ July 10, 2014) ---Ikinatuwa ni World Food Program (WFP) Country Director for Asia Kenro Ashidara ang mahusay na implementasyon ng isang fish pen project sa Barangay Katilacan, Pikit, Cotabato na kanyang binisita noong huling linggo ng Hunyo, 2014.

Ayon kay WFP Protracted Relief and Recovery Operations – Project Management Office (PRRO-PMO) Focal Person Allan Matullano, ang naturang proyekto ay itinayo sa Barangay Katilacan noong unang bahagi ng 2013, ito ayon sa report ni PGO Media Center Head Jimmy Santa Cruz.

Mga isdang tilapia ang inaalagaan rito at nagsisilbing hanap-buhay ng maraming mga residente doon na una ng nakaranas ng kaguluhan dulot ng mga engkuwentro sa pagitan ng mga armadong grupo at military.

Sinabi ni Matullano na masaya si Ashidara dahil nakita nito ang mabuting epekto ng proyekto sa mga mamamayan ng Katilacan kung saan pinakikinabangan ito ng husto.

Layon ng WFP na makabangon ang Barangay Katilacan mula sa kahirapan dulot ng mga karahasan o kaguluhan sa pamamagitan ng pagbibigay ng proyekto at hanap buhay para sa mga residente.

Maliban sa fish pen, may iba pang developmental at humanitarian projects ang WFP sa Katilacan at ilan rito ay backyard gardening at food feeding.

Sa pamamagitan nito ayon pa kay Matullano ay unti-unting makakabangon ang barangay at kung pagbubutihin pa ang proyekto ay tiyak na aangat ang kanilang buhay.

Nakipagpulong naman si Ashidara sa mga barangay officials ng Katilacan at mga mangingisda sa lugar at personal na inalam ang kanilang kalagayan kasabay ang pangako na di bibitaw ang WFP sa tungkulin nitong tulungan ang mga barangay na tulad ng Katilacan.

Maliban sa Katilacan, dalawa pang kalapit-barangay ang nabiyayaan din ng katulad na proyekto at ito ay ang Damalasak at Silik na nakaranas din kaguluhan.

Pinasalamatan naman ng mga taga Barangay Katilacan si Ashidara sa pagbisita nito sa kanila at sa mga tulong na ipinagkakaloob ng WFP sa kanila. (JIMMY STA. CRUZ/PGO Media Center, DXVL News)