Faultline sa Carmen, North Cotabato, di raw apektado sa tumamang 7.2 Magnitude na Lindol sa Bohol

(Kabacan, North Cotabato/ October 21, 2013) ---Tiniyak ng pamunuan ng Phivolcs Cotabato City na hindi nakakaapekto sa faultline ng Carmen, North Cotabato ang tumamang 7.2 Magnitude na lindol sa Bohol.

Ito ang nabatid mula kay Phivolcs Cotabato City head Engr. Ranier Amilbahar.

Sinabi nitong, malayo sa Central Mindanao ang epicenter ng magnitude 7.2 na lindol kaya malayong itong makapaminsala sa Cotabato City at mga kalapit lugar.

Sinabi ni Amilbahar na higit 50 kilometro na ang layo ng gumalaw na fault line sa Visayas kaya wala itong apekto sa mga aktibong fault line dito sa Mindanao.

Sa kabila nito, hinimok ni Amilbahar ang mamamayan na manatiling mahinahon kung makakaranas ng lindol.

Sa pinakahuling ulat, Patuloy ang pagtaas ng bilang ng mga nasasawi mula sa 7.2 magnitude na lindol na nanalasa sa Central Visayas kung saan umakyat na ito sa 185 kahapon.

Sa huling update ng National Disaster Risk Reduction and Management Council, bukod dito, pumalo na rin sa 2,047 aftershocks ang naitala simula noong Martes, 37 rito ay naram­daman.

Sa 185 na nasawi, 172 ay mula sa Bohol, 12 mula sa Cebu at isa sa Siquijor. Umabot naman sa 583 ang sugatan, habang siyam ang nawawala.

Sabi pa ng NDRRMC, ang lindol ay nakaapekto sa 703,244 pamilya, o 3,542,281 tao sa may 1,394 barangay sa 54 bayan at walong siyudad sa anim na probinsya.

Dito, may 22,816 pa­milya o 113,227 tao ang na­nanatili sa may 93 eva­­cuation centers. Samantala, nagtala naman ng 8,480 kabahayan ang nawasak habang 28,165 ang nasira sa may Bohol, Cebu, Negros Occidental, Iloilo at Guimaras. Uma­bot naman sa kabuuang P549.85 million ang nasirang ari-arian.

Naitala naman sa 374 ang nasugatan, 182 dito ay sa Cebu, 188 sa Bohol, 3 sa Siquijor at isa sa Negros Oriental.

Posible umanong sanhi ng bagong fault system ang 7.2 magnitude lindol na tumama sa Central Visayas.

Samantala, balik na umano ngayong araw, Oktubre 21 sa normal ang klase sa ilang mga lugar na nasalanta dahil sa malakas na lindol sa Central Visayas habang  bigo pa rin ang mga rescue teams na mahanap kahapon ang limang kabataan na naiulat na missing kasunod sa pagtama ng magnitude 7.2 earthquake sa lalawigan ng Bohol. (Rhoderick Beñez)