Ramadan, bukas pa magsisimula matapos na di makita ang buwan kagabi

(Kabacan, North Cotabato/ July 9, 2013) ---Bukas pa pormal na magsisimula ang Holy Month of Ramadan o ang pag-aayuno ng mga kapatid na muslim matapos na di makita ang buwan kagabi.

Ito ang sinabi sa DXVL Radyo ng Bayan ni Sultan sa Lanang Prof. Salik Makakena batay sa opisyal text message na kanyang ipinarating sa himpilan kagabi.

Aniya, di umano nila nakita ang buwan sa isinagawa nilang moon sighting kaya bukas pa magsisimula ang nasabing pag-aayuno.

Kaugnay nito, may mga inihahanda na ring programa ang pamunuan ng Institute of Middle East and Asian Studies o IMEAS sa nasabing okasyon.

Ang Ramadan ang ika-siyam na buwan ng kalendaryong Islam. 

Ito ang buwan kung kailan inihayag ni Allah ang Qur’an sa propetang si Muhammad. Ang Ramadan ay galing sa salitang Arabo na ang ibig sabihin ay “nakapapasong init”.

Isa itong espesyal na buwan sa bawat taon para sa mahigit isang bilyong Muslim sa buong mundo.

Ito ay panahon ng pagbubulay-bulay, debosyon sa Diyos, at pagpigil sa sarili.

Para sa mga Muslim, isa itong pagsasaayos at pagpapatibay ng kanilang ispirituwal na buhay.

Ang Ramadan ay opurtunidad ng pag-unlad sa pamamagitan ng pagbibigay at pagiging malakas sa pamamagitan ng katatagan sa gitna ng kahirapan. 

Layunin nito na maranasan ang gutom upang magkaroon ng simpatiya sa mga mahihirap.


Ito rin ang oras ng pagpapasalamat kay Allah para sa lahat ng mga biyaya at pag-iwas sa mga bagay na hindi nakalulugod sa Kanya. (Rhoderick Beñez)