COTELCO service area, muling makakaranas ng brownout ngayong Agusto

(Matalam, North Cotabato/ August 1, 2013) ---Aasahan na umanong makakaranas ng rotational brown-out ang service area ng Cotabato Electric Cooperative Inc., Cotelco sa pagpasok ng buwan ng Agosto.

Pero ayon kay Cotelco Manager Engr. Godofredo Homez, mas maikli ang oras na walang supply ng kuryente sa service area.Simula ngayong linggo kasi ay isasailalim sa preventive maintenance ang isa sa mga hydropower plant sa Lanao provinces na may kakayahang magbigay ng 100 megawatts na supply ng koryente sa Mindanao grid.

Ayon kay Homez, mangangahulugan na ang nalalabing supply ng kuryente sa Mindanao ay pantay-pantay na hahatiin ng lahat ng mga electric cooperative sa Mindanao sa pamamagitan ng National Grid Corporation of the Philippines.

Pinakamahaba na brownout, ayon kay Homez, ay dalawang oras kumpara sa halos walong oras noong mga buwan ng Enero hanggang Abril. (Rhoderick Beñez)