(Kabacan, North Cotabato/ July 29, 2013) ---Sugatan
ang isang 50-anyos na barangay kagawad makaraang pagbabarilin ng di pa
nakilalang suspek sa Kabacan Public Market, Poblacion, Kabacan alas 12:20 ng
tanghali kahapon.
Kinilala ni PCInsp. Jordine Maribojo, hepe
ng Kabacan PNP ang biktima na si Leopolfo Morqueda, may asawa, miyembro ng
konseho ng brgy Liliongan bayan ng Carmen.
Batay sa report, habang sinisiyasat umano ng
biktima ang ipinarada nitong pampasaherong jeep sa parking area ay bigla na
lamang itong nilapitan ng di kilalang lalaki at walang abu-abong pinagbabaril
si Morqueda.
Nagtamo ng iba’t-ibang tama ng bala ng .45
na pistol ang biktima batay sa mga empty shell na narekober sa crime scene.
Agad na ikinasa ang trackdown operation
laban sa suspek ng pinagsanib na pwersa ng Kabacan PNP at 7IB, 38IB ng
Philippine Army pero bigo nilang mahuli ang suspek.
Nagpapagaling na ngayon sa bahay pagamutan
ang biktima habang nagpapatuloy ang imbestigasyon at inaalam ang motibo sa
nasabing pamamaril. (Rhoderick Beñez)
0 comments:
Mag-post ng isang Komento