EDC tutol sa plano na bigyan ng direktang linya ang Cotelco mula sa itatayong geothermal power plant sa Mt Apo

(Kidapawan city/August 18, 2012) ---Tutol ang Energy Development Corporation o EDC na bigyan ng direkta at hiwalay na linya ang Cotelco mula sa itatayong geothermal power plant sa Mount Apo.

       

Sinabi ni EDC president at chief operations officer Richard Tantoco na kapag ‘embedded’ na ang koneksyon ng planta sa Cotelco, tiyak, hindi na magiging ‘financially viable’ ang proyekto.

       

Paliwanag ni Tantoco na sa mga nauna’ng pag-uusap ng EDC sa Cotelco, abot lamang sa 20 megawatts ng kuryente ang bibilhin ng kooperatiba mula sa Mindanao-3 geothermal power plant.

       

Kapag may direkta at hiwalay na linya para sa Cotelco, ayon kay Tantoco, di na raw nila puwede’ng ibenta sa TransCo grid ang natitira’ng 30 megawatts.

       

Kaya’t tingin ni Tantoco, hindi magiging ‘financially viable’ ang proyekto kung igigiit ng Kidapawan City LGU ang pagkakaroon ng hiwalay at direktang linya ng kuryente para sa Cotelco mula sa planta.

       

Ito ang buod ng sulat na ipinarating ni Tantoco kay Vice-Mayor Joseph Evangelista, ang presiding officer ng Sangguniang Panglungsod ng Kidapawan.

       

Kanina, tinalakay sa isang closed-door meeting ng Sanggunian ang isyu.

NOON pang nakaraang Hulyo naaprubahan ng Sanggunian ang isang resolusyon na nag-e-endorso sa Mindanao 3 geothermal power plant project.

Sa Section 1 ng Resolution Number 12-251 nakasaad rito ang paghiling ng City LGU ng direktang linya ng kuryente mula sa planta sa pamamagitan ng isang ‘embedded connection.’  (MCM)