Grupo ng BIFF, itinuturong nasa likod ng panibagong pagsabog sa Kabacan

(Kabacan, North Cotabato/August 13, 2012) ---Kagagawan umano ng mga tagasuporta ng Bangsamoro Islamic Freedom Movement (BIFM) ang tatlong magkakasunod na pagsabog sa lalawigan ng North Cotabato at Maguindanao kamakalawa ng gabi.

Ang unang pagsabog ay naitala nitong Biyernes ng gabi dakong alas-7:40 sa Barangay Crossing Awang, Datu Odin Sinsuat, Maguinadanao malapit sa airport at 6th ID headquarters.

Sinundan ito ng isang pagsabog sa dito sa bayan ng Kabacan dakong alas 8:15 ng gabi kungsaan tumama ang bala ng 40mm launcher grenade na M79 sa bubong ng Quaknet Internet Café, ito ayon kay P/Supt. Raul Supiter, hepe ng Kabacan PNP.

Sinabi ni Supiter na wala namang nasaktan o nasawi sa panibagong pagpapasabog.
Bukod dito, agad namang nasundan ang nasabing pagsabog bandang alas 8:30 ng gabi sa bayan ng M’lang.

Sa report ng PNP, inilagay ang bomba sa isang kanal sa may bagsakan ng gulay sa boundary ng Barangay Poblacion at Dungguan sa national highway.

      

Wala namang nasugatan o nasawi sa naturang pagsabog, ayon sa report.

      

Naganap ang mga pagsabog habang humuhupa na ang bakbakan sa pagitan ng tropa ng gubyerno at ng Bangsamoro Islamic Freedom Fighters sa Maguindanao.

      

Ito na ang ikatlong pagsabog na naganap sa lalawigan ng North Cotabato, simula nito’ng Lunes.

      

Ang una ay sa bayan ng Pikit kung saan pinasabugan ng di kilalang mga suspect ang detachment ng CAFGU na nagresulta sa pagkakasugat ng lima katao, apat rito mga CAFGU.(Rhoderick Beñez)