(Matalam, North Cotabato/August 14, 2012) ---Kritikal ang kondisyon ng
kagawad ng Barangay Marbel sa bayan ng Matalam, North Cotabato matapos
pagbabarilin ng ‘di kilalang mga lalaki sa loob ng public market, pasado alas
dyes ng umaga, kahapon.
Nagtamo ng sugat sa
iba’t-ibang bahagi ng katawan niya ang biktima na kinilalang si Bong Palalay,
kagawad ng Barangay Marbel.
Ayon kay SPO2 Froilan
Gravidez ng Matalam PNP, nakatayo sa isang bahagi ng public market si
kagawad Palalay nang parahan ng isang motorsiklo at barilin.
Dalawang mga driver ng
trisikad na nakaparada sa lugar ang tinamaan ng mga ligaw na bala at isinugod
rin sa Babol Hospital sa Poblacion ng Matalam.
Kinilala ang mga ito na
sina Datu Manong Abas na taga-barangay Marbel, at Mangadta Norodin na residente
ng Barangay Kidama, pawang sa bayan ng Matalam.
Agad namang inilipat
ang tatlo sa Cotabato Provincial Hospital sa Amas complex, bandang alas 10:30
ng umaga, kahapon, ayon kay SPO2 Froilan Gravidez ng investigation section ng
Matalam PNP.
Samantala, nang
rumesponde sa crime scene ang mga operatiba ng Matalam PNP, hinabol nila ang
mga suspect na sakay ng motorsiklo.
Habang hinahabol nila
ng police car ang isa pang motor ay nagpasabog ng granada ang mga suspek.
Swerte namang di
tinamaan ang mga sakay ng sasakyan.
Patuloy pa ring
tinutugis ng PNP ang mga suspek na sakay ng dalawang motorsiklong walang plaka.
Inaalam din ng PNP kung
ang shooting incident ay may kinalaman sa serye ng pamamaril na naganap sa
ilang mga bayan sa lalawigan. (Rhoderick Beñez)
0 comments:
Mag-post ng isang Komento