NBI, PNP clearance sa pagkuha ng lisensiya sa LTO, inaasahang i-suspende anumang araw simula ngayon ---LTO Kabacan District

(Kabacan, North Cotabato/ November 26, 2015) ---Anumang araw simula ngayon ay posibleng isuspende ng Land Transportation Office o LTO ang bagong panuntunan nito na nag-aatas sa mga kukuha ng professional driver’s license na kumuha ng clearance sa pulisya at NBI.

Ito ayon kay LTO Kabacan District Head Ansary Sumpingan sa panayam ng DXVL News. Ayon sa opisyal posible ngayong araw ay ibababa ng Regional Office 12 ang nasabing kalatas na nag-su-suspende sa nasabing panukala.

Sa pagdinig kasi ng national budget ng DOTC kinuwestiyon nina Senate President Franklin Drilon at Senate Pro Tempore Ralph Recto ang nasabing polisiya na anila’y pahirap lamang sa mga mamamayan.

Ayon kay Recto, dapat lang na suspendihin muna ito dahil delayed naman ang paglalabas ng mga plaka ng mga sasakyan at nababalam rin ang pagpapalabas ng mga driver’s license.

Kinuwestiyon naman ni Drilon kung anong klaseng impormasyon sa mga pulis at NBI clearance ang magiging daan upang hindi mabigyan ng driver’s license ang isang kumukuha ng lisensiya.

Sabi naman ni DOTC Sec. Joseph Emilio Abaya, ang mga krimen ay tungkol sa “crime against persons at property at moral certitude.”

Dahil hindi sapat para kay Drilon ang mga paliwanag na natanggap, iginiit nito sa DOTC na pansamantalang ipasuspinde sa LTO ang nasabing bagong polisiya.

Pero ayon kay Ansary,  hihintay muna nila ang MOA circular bago ipatutupad ang pagsuspende sa rules and regulation governing the issuance of student Permit at Driver’s license. Habang wala pang Memoramdom sa nasabing pagsuspende, patuloy nilang ipatupad ang bagong patakaran ng LTO.

Aminado naman si Ansary na marami sa mga kumukuha ng Driver’s license ang nagrereklamo sa nasabing bagong batas. Rhoderick Beñez