AMAS, Kidapawan City (Nov 24) – Dinagsa ng abot sa 400 na
mga buntis mula sa iba’t-ibang munisipyo at nag-iisang lungsod sa Lalawigan ng
Cotabato ang Provincial “Buntis Congress” sa Provincial Capitol gymnasium
kahapon, Nov. 19, 2015.
Ayon kay Cotabato
Integrated Provincial Health Office (IPHO) Head Dr. Eva C. Rabaya, ang
aktibidad ay bahagi ng Universal Health Care High Impact 5 Hi-Five Hospital na
isinusulong ng Dept of Health o DOH kung saan partner ang mga government
hospitals tulad ng Cot Provincial Hospital o CPH.
Mismong si DOH 12
Regional Director Dr. Teogenes Baluma ang nagbigay ng mensahe para sa mga
buntis patungkol sa aktibidad na naglalayong maging malusog at ligtas ang
pagbubuntis ng mga kababaihan o mga nanay.
Ayon kay Dr. Baluma,
pinalalakas pa ng DOH ang kampanya para sa mga buntis alinsunod na rin sa Universal
Health Care High Impact 5.
Kaugnay nito,
nagsagawa ng libreng check-up at laboratory exam ang mga doctors mula sa DOH at
CPH para sa mga buntis kabilang rito ang blood pressure, ultrasound pati na
lectures at paala-ala para sa mga buntis.
Higit na natuwa ang
mga dumalong buntis matapos na mamahagi ng pregnancy kit ang DOH para sa kanila.
Suportado naman ni
Gov Emmylou “Lala” J. Taliño-Mendoza ang naturang aktibidad kasabay ang pahayag
na kailangang mapanatili ang kaligtasan ng mga nanay at sanggol mula sa
pagbubuntis hanggang sa panganganak.
Naniniwala ang
gobernadora na sa pamamagitan ng “Buntis Congress” ay mas maraming ina at
sanggol ang maliligtas mula sa mga sakit at kapahamakan.
Nangako rin ang
gobernadora na magpapatuloy ang mahusay na ugnayan ng DOH at ng provincial
government lalo na sa pagpapatupad ng mga programa para sa kalusugan ng mga
mamamayan.
Samantala, abot naman
sa 60 na mga miyembro ng Phil. Army at iba pang sektor ang nagbigay ng dugo sa
blood letting activity na isinabay sa “Buntis Congress” sa provincial gym.
Layon ng aktibidad na
makabigay ng supply ng dugo sa Phil. Red Cross o PRC at magamit ito ng mga
nangangailangan.
Ayon kay PRC Cotabato
City Chapter Chairman Bai Fatima Sinsuat, mahalaga ang kahalintulad na
aktibidad upang matiyak ang maayos at sapat na deposito ng dugo sa mga blood
banks at mga pagamutan. (JIMMY STA.
CRUZ-PGO Media Center)
0 comments:
Mag-post ng isang Komento