EXCLUSIVE Featured Story: DALAWANG KABATAANG KABAKEÑOS, PASOK SA SCHOOL OF PEACE 2015 SA DARATING NA AGOSTO SA BANSANG CAMBODIA

Ms. A-Esha Afdal Ampatuan

Rene M. Bunduzan

(Kabacan, North Cotabato/ June 8, 2015)----Kompirmadong pasok na sina Ms. A-Esha Afdal Ampatuan ng Barangay Poblacion at Mr. Rene M. Bunduzan ng Barangay Tamped sa School of Peace 2015 na gaganapin sa Agosto ng taong kasalukuyan sa Siem Reap, Cambodia. 

Sa ipinadalang acceptance letter ni Mr. Max Ediger, ang coordinator ng Interfaith Cooperation Forum sa dalawang partisipante noong Hunyo a singko, kanyang inihayag dito ang pagqualify ni Ms. Ampatuan at Mr. Bundozan sa nasabing Programa. 

Pormal na magsisimula ang nasabing School of Peace 2015 na may temang: Interfaith Dialogue moving from tolerance, to acceptance, to engagement, sa unang lingo ng Agosto at magtatapos sa October ng taong kasalukuyan.

Ang nasabing School of Peace ay isa lamang sa mga programa ng Interfaith Cooperation Forum na pinondohan ng Bread for the World ng Berlin, Germany. 

Isa itong inisyatibo na may layong turuan at engganyuhin ang mga kabataan sa buong Southeast Asia na gumawa ng kanilang inisyatibo para sa isang komunidad na may respeto, pagkakaisa at kooperasayon para sa isang “Justpeace” movement at upang matutunan nila ang non-violent actions to resolving conflicts.

Ang dalawang kabataan ay makikisalamuha sa ibat-ibang kabataan na magmumula naman sa ibat-ibang bansa sa Southeast Asia. Inaasahan din na pagkatapos ng nasabing School of Peace ay babalik ang mga ito sa kanilang komunidad upang maibahagi ang kanilang natutunan.

Si Ms. A-Esha Afdal Ampatuan at Mr. Rene M. Bundozan ay mga graduates ng University of Southern Mindanao at tubong Kabacan at kasalukuyang nagbibigay ng kanilang boluntaryong serbisyo sa pamamagitan ng Literacy-Numeracy classes o sessions sa mga Moro at Indigenous People communities.

Ayon naman kay First Lady, Mrs. Evangeline Pascua Guzman, ang may bahay ni Mayor Herlo P. Guzman, Jr. masaya umano siya sa katuparan ng pangarap ni Ms. Ampatuan at Mr. Bundozan na maging kinatawan ng Kabacan sa School of Peace 2015. 

Inaasahan din niyang magsisilbi ang dalawang kabataan sa kani-kanilang mga komunidad. Isa si Mrs. Guzman na nagbigay ng rekomendasyon para kay Mr. Bundozan na mapasok sa nasabing programa.

Sa ngayon, ang dalawang kabataan ay naghahanda sa nalalapit nilang pag-alis sa bansa upang ibahagi ang kanilang kultura at kaalaman sa iba pang mga partesipante na nagmumula naman sa mga bansa sa Southeast Asia. Sarrah Jane C. Guerrero