Revised Penal Code 333 o Adultery at Revised Penal Code 334 o Concubinage ipinaliwanag ni Hon. Judge Laureano Azate

By: Christine Limos

(Kabacan, North Cotabato/ April 24, 2015) ---Ipinaliwanag ni Hon. Judge Laureano Azate ng RTC Branch 22 Kabacan ang Revised Penal Code 333 o adultery at Revised Penal Code 334 o concubinage.

Sa panayam ng DXVL news inihayag ng hukom na ang Revised Penal Code 333 o Adultery ay maaaring isampang kaso sa babaeng may asawa na naki-apid sa isang lalaki.

Ang Revised Penal Code 334 naman o Concubinage ay kasong maaaring isampa sa isang lalaki na may asawa na naki-apid sa isang babae.

Ipinaliwanag din ng hukom na kung sakaling nahuli sa akto ang asawa na may kasiping na kalaguyo at mapatay ang mga ito dahil sa pagdidilim ng paningin o sa sobrang galit ang magiging parusa ay destierro na nakapaloob sa probisyon ng Revised Penal Code Article 247.

Ang destierro umano ay proteksyon para sa concubine na pinaalis.

Dagdag pa ng hukom na ang saklaw lamang sa Article 247 ay ang insidente ng pagpatay habang huli sa akto ang asawa at ang kalaguyo na nakikipagtalik. 

Kung palilipasin na ng ilang araw, ibang kaso na naman ang kakaharapin ng suspek.

Samantala, ipinaliwanag rin ni Hon. Judge Alzate ang patungkol sa pagkakaroon ng anak ng lalaki sa ibang babae at hindi ito pinakasalan.

Aniya maaaring mag file ang ina ng acknowledgement o recognition para sa bata.

Kung ma acknowledge na umano ng ama ang bata ay susunod na maibibigay ang suporta sa bata.

Dagdag pa ng huwes na kung sakaling umalis ang legal wife sa bahay nang walang dahilan ay mawawalan siya ng suporta.