(Kabacan, North Cotabato/ February
10, 2015) ---Dalawang pasahero ang namatay habang 10 naman ang malubhang
nasugatan makaraang magbanggaan ang pampasaherong van at forward truck sa
kahabaan ng national highway sa Barangay Sinawilan, bayan ng Matanao, Davao del
Sur kamakalawang hapon.
Ito ang kinumpirma sa panayam ng DXVL
News kay PCI Elmer Cabuslay, ang hepe ng Matan-ao PNP.
Kinilala nito ang namatay na si
Dennis Elebado ng Sto. Niño bayan ng Makilak, North Cotabato ang isa sa namatay
habang inaalam pa ang pagkakakilanlan ng isa.
Isinugod naman sa pagamutan ang mga
nasugatang biktima kabilang ang driver at konduktor ng pampasaherong van.
Kabilang sa mga malubhang nasugatang
dinala sa Southern Phils. Medical Center ay sina Maria Tausa, Ronald Cagebed,
Ariel Calaraga, Reynald Terante, Petty John Pudulino, Maria Vilma Parada,
Belinda Merin, Agnes Hesansa, Nina Tilaca at si Danilo Tilaca.
Sinabi ni Cabuslay na naganap ang
sakuna dakong alas-3:20 ng hapon.
Bumabagtas ang GT Express Service van
ni Roy Lobrego na residente ng brgy. Osias, Kabacan, cotabato na may biyaheng
Kidapawan City-Davao City nang salpukin ito ng kasalubong na forward truck (GGB
434) na minamaneho ni Julius Generale, 44, ng Bansalan, Davao del Sur .
Sa inisyal na imbestigasyon, posibleng
nakaidlip ang driver ng truck kaya naganap ang sakuna.
Sumuko naman sa pulisya ang driver ng
truck na nahaharap sa kasong reckless imprudence resulting to double homicide
at multiple frustrated homicide. Rhoderick Beñez
0 comments:
Mag-post ng isang Komento