Labi ng OFW na nagpakamatay sa ibayong dagat, dumating na sa Kabacan

(Kabacan, North Cotabato/ February 9, 2015) ---Nakatakda na ngang ihahatid ang labi ni Ms. Carolyn Pagaran Comilang sa kanyang huling hantungan ngayong umaga, February 9, 2015 sa compound ng kanilang bahay sa may Bonifacio St. Kabacan, Cotabato. Dumating ang kanyang mga labi dito sa Kabacan noong February 6, 2015 ng umaga, mula pa sa Damam, Saudi Arabia.

Matatandaan na noong October 23, 2014 naibalitang nagpakamatay si Ms. Carolyn Comilang sa pamamagitan ng pagbibigti sa kanyang sarili sa loob ng kanilang apartment na tinutuluyan sa Damam, Saudi Arabia.

Ayon pa sa kanyang ina na si Mrs. Evangeline P. Comilang, na isa ring OFW sa Riyadh, Saudi Arabia, masayahing bata umano si Carolyn at hindi makikitaan ng anumang problema.

Subalit ayaw niyang magbigay ng anumang ekspikulasyon hinggil sa pagkamatay ng kaniyang anak.

Si Ms. Carolyn Pagaran Comilang, pangalawa sa tatlong magkakapatid at nag-iisang anak na babae ay isang registered nurse at graduate ng University of Southern Mindanao taong 2010.

Naging volunteered nurse siya sa USM Hospital at naging Nurse to the Barangay ng LGU Makilala bago pa man siya  naging nurse sa isang clinic sa Damam, Saudi Arabia na tatlong buwan lamang siyang nagtrabaho dito bago ang kanyang kamatayan.

Sa tulong ng Lokal na Pamahalaan ng Kabacan sa opisina ni Hon. Mayor Herlo P. Guzman Jr. sa pamamagitan ni Public OFW Desk Officer, Yvonne V. Saliling, napadali ang pag-aasikaso sa pag-uuwi sa bangkay ni Ms. Carolyn P. Comilang. 

Ayon pa kay Ms. Saliling, dahil sa close coordination at constant follow-up sa opisina ni Vice- President Jejomar Binay, OWWA Reg’l Office at sa tulong ng mga kaanak at kapamilya ni Ms. Carolyn, natutukan ang pagpapa-uwi sa bangkay ni Ms. Carolyn Comilang. Sarah Jane C. Guerrero, LGU Kabacan