Abot sa 142 na mga preso sa Cotabato napalaya ng EJOW

AMAS, Kidapawan City (Sep 26) – Abot sa 142 na inmates mula sa iba’t-ibang mga district jails sa Cotabato ang pinawalang sala at tuluyan ng nakalaya matapos gawin ang Enhanced Justice on Wheels o EJOW sa Provincial Capitol kahapon, Sep 25, 2014.

Pinangunahan ni Hon. Judge Lily Lydia A. Laquindanum ng Regional Trial Court Branch 24 ng Midsayap, Cotabato at Overall Co-Chairman ng EJOW and the Increasing Access to Juctice by the Poor Program ang mobile court hearing ng mga preso.

Mula sa bilang na 144 ay dalawang mga inmates naman ang convicted at iko-commit ang mga ito sa Davao Penal Colony  o DAPECOL habang ang 148 naman ay binigyan ng pagkakataong makapag-bagong buhay matapos na ibasura ng korte ang kani-kanilang mga kaso.

Humigit-kumulang naman sa 180 kaso ang dininig ni Hon. Judge Laquindanum kasama ang iba pang mga huwes na kinabibilangan nina Judge Laureano Alzate ng Regional Trial Court Branch 22 ng Kabacan, Judge Henelinda Molina-Diaz ng Regional Trial Court 23 ng Kidapawan City, Judge Alexander B. Yarra ng Municipal Trial Courts in Cities Branch 5 ng Pigcawayan Judge Rebecca Elena de Leon at iba pang huwes mula sa lalawigan ng Cotabato.

Dalawang Justice On Wheels o JOW bus na pag-aari ng Supreme Court ang ginamit ng mga huwes sa pagdinig habang ang iba naman ay sa nagtayo ng make-shift courts sa harapan ng provincial gym.

Pinakamarami sa mga napalayang preso ay mula sa Cotabato District Jail o CDJ na mahigit 100 ang bilang habang ang iba naman ay mula sa Kidapawan, Makilala, Pigcawayan district jails at Kabacan Reformatory Center.

Iba’t-ibang kaso naman ang kinakaharap ng mga inmates na sumailalim sa EJOW kahapon kabilang ang possession of illegal drugs, illegal possession of firearms, robbery, homicide, murder at iba pa.

Karamihan sa mga kasong dininig sa EJOW ay hindi na interesado at din nagpapakita sa korte ang mga complainants at testigo, lumampas na sa takdang jail term, mga minor disputes at iba pa na kwalipikado sa naturang programa.

Dumating naman sa EJOW si Supreme Court Deputy Court Administrator Thelma C. Bahia bilang representante ng SC at nagbigay ng mensahe sa opening program na ginanap sa provincial gym.

Sinagot din ni Bahia ang ilang mga katanungan mula sa mga stakeholders tulad ng media, academe, police, government at non-government organizations sa dialogue na ginanap sa rooftop ng Provincial Capitol Building habang ang ilang mga SC officials naman ay nagsagawa ng information dissemination sa provincial gym para sa mga barangay officials.

Ayon kay Bahia, sa pamamagitan ng EJOW ay nabigyan ng mabilis na proseso at hustisya ang mga bilanggo sa Cotabato Province lalo na ang mga mahihirap.

Nagbigay daan din daw ito upang mabawasan ang bilang ng mga preso sa CDJ na ang kapasidad ay mula 300-400 inmates pero sa kasalukuyan ay mula 700-800 na ang mga nakapiit doon.

Pinasalamatan naman ni Bahia si Governor Emmylou “Lala” J. Taliño-Mendoza dahil ito raw mismo ang nanguna sa koordinasyon sa SC upang isagawa muli ang JOW sa Cotabato.

Matatandaang noong 2012 ay una ng ginawa ang JOW sa Cotabato kung saan abot sa 89 ang mga detainees na napalaya at nagkaroon ng bagong buhay.

Samantala, ginanap din kahapon ang jail visitation at medical-dental outreach sa CDJ sa pangunguna ng Integrated Bar of the Philippines North Cotabato Chapter.

Nagkaroon din ng team-building activity ang mga personnel at staff ng iba’t-ibang RTC at MTCC sa Cotabato sa rooftop ng kapitolyo upang mapalakas pa ang kanilang ugnayan sa isa’t-isa. (JIMMY STA. CRUZ/PGO Media Center)