Daan-daang mga buntis, nakiisa sa isinagawang “buntis day” sa bayan ng Mlang

By: Williamore Magbanua

(Malang, North Cotabato/ August 8, 2014) ---Daan-daang mga buntis mula sa ibat-ibang barangay sa bayang ito ang nakiisa sa isinagawang “buntis day” na inorganisa nang Municipal Health Office (MHO) nitong araw ng Huwebes.

Ayon kay Dr. Glecerio Sotea, MD ang health officer ng Mlang na layon ng nasabing aktibidad na magabayan ang mga buntis sa tamang pangangalaga ng kanilang mga sarili hanggang sa mailuwal nila ang kanilang mga supling.

Ani Sotea, mahalaga na maayos ang pangangatawan ng isang buntis habang pinaghahandaan nito ang panganganak.

Dagdag pa ng doctor, isinagawa ang nasabing pagtitipon upang ituro sa mga buntis ang tamang pagkain at ehersisyo para mapanatili ang magandang kalusugan ng sanggol habang nasa sinapupunan pa nang ina.

Kabilang sa buong araw na aktibidad ang information and education campaign higgil sa panganganak sa mga lying-in centers; libreng laboratory work up katulad ng hemoglobin determination at urinalysis, libreng family planning services, tulad ng bilateral tubal ligation, IUD, depo at pagbibigay ng pills.

Magkakaroon din ng libreng papsmear at mga supplements.

Pinasalamatan naman ni Dr. Sotea ang Lokal na pamahalaan ng Mlang dahil sa siento-porsiyentong suporta nito hinggil sa pangangalaga ng mga buntis.

Umaasa si Sotea na sa pamamagitan nang aktibidad makakamit ng bayan ng Mlang ang zero maternal deaths partikular sa mga buntis.

Mahigit isang dosenang mga lying inns na ang naipatayo sa ibat-ibang barangay ng bayan sa tulong ng Department of Health at nang LGU Mlang. DXVL News