Tribong Mascuvado ng Matalam, kampeon sa street dancing Showdown ng Kalivungan Festival

(Amas, Kidapawan City/ September 2, 2013) ---Iniuwi ng tribong Mascuvado buhat sa bayan ng Matalam, North Cotabato ang kampeonato ngayong taon sa katatapos na Street Dancing competition ng Kalivungan Festival 2013 at 99^th founding Anniversary ng North Cotabato.

Nakuha naman ng grupong Panaghoy sa Pulangi mula sa bayan ng Carmen ang 1^st place habang nasungkit naman ng grupong Kabakeños mula dito sa bayan ng Kabacan ang ikalawang pwesto sa nasabing street dancing showdown competition na isa sa mga highlight ng aktibidad.

Matatandaan na anim na grupo ang nagpakitang gilas sa kanilang pagsayaw at pag-indak bilang pagpapakita ng kultura ng kanilang bayan.

Ang mga kalahok ay nagmula sa mga bayan  ng Makilala, Kidapawan, Matalam, Kabacan, Carmen at Pigcawayan.

Tatanggap naman ng 150 thousand pesos ang first prize winner, 100 thousand para sa second prize at 75 thousand pesos para sa 3rd prize winner.

Ang mananalo ay magiging kinatawan ng lalawigan sa Aliwan Festival sa Maynila ngayong taon.

Tema ng Kalivungan Festival 2013 ngayong taon ay “Cotabato @99: Nagkakaisang Lakas Tungo sa Matatag na Bukas. (Rhoderick Beñez)