Problema sa pasahod dahilan ng pagsunog ng Rubber Plant sa Makilala

(Makilala, North Cotabato/ September 6, 2013) ---Inamin ng isang kasapi ng New People's Army, National Democratic Front Far South Mindanao na problema sa pasahod ang isa sa mga dahilan ng pagsunog ng ilang myembro ng NPA sa isang rubber processing plant sa Makilala, North Cotabato, kamakalawa ng gabi.

Mismong si New People's Army, National Democratic Front Far South Mindanao Ka Efren ang nagbunyag ng nasabing report.

Anila, ilang beses na nilang pinadalhan ng sulat ang management ng rubber plantation subalit tumanggi ang mga itong tugunan ang problema.

Dagdag pa ni Ka Efren,masusi nilang pinagplanuhan ang panununog bago ito isinagawa. 

Samantala sa ibangmag balita, sugatan ang dalawang motorista matapos na aksidenteng magkabanggan sa Barangay Sudapin Kidapawan City alas tres ng hapon kamakalawa.

Kinilala ang mga biktima na sina Ariel Rangas at Jordan Dorianes na pawang driver ng motorsiklo.

Ayon sa report, minamaneho ni Jordan Dorianes ang kanyang motorsiklo at hindi nito namalayan ang paparating na motorsiklong minamaneho naman ni Ariel Rangas nang magtangka itong lumiko sa kaliwang bahagi ng kalsada.

Sa lakas ng pagkakabangga kapwa nagtamo ng sugat sina Rangas at Dorianes na kaagad namang isinugod sa pinakamalapit sa ospital. (Rhoderick Beñez)