Mahigit 100 mga motorsiklo, nakumpiska sa isinagawang lambat Bitag ng Kabacan PNP

(Kabacan, North Cotabato/ July 16, 2013) ---Abot sa 138 motorsiklo na walang plaka ang nakumpiska sa isinagawang Oplan Lambat Bitag ng Kabacan PNP nitong linggo.

Ayon kay Kabacan PNP Chief Inspector Jubernadin Panes, ito ang naging bunga ng kanilang implementasyon sa nasabing programa upang mapigilan ang mga motoristang bumibiyahe ng walang plaka.

Isa rin ito sa solusyon upang masawata ang iba't-ibang kriminalidad kung saan, karaniwang gamit ng mga suspek ang mga motorsiklong walang plate number.

Sa mas pinalawak na pagpapatupad ng Oplan Lambat Bitag,umaasa ang opisyal na mababawasan na ang kaso ng mga krimeng may kinalaman sa mga riding-in-tandem.

Sa ngayon ay nasa kostudiya na ng Kabacan PNP ang nasabing mga motorsiklo.

Sa Pikit, North Cotabato naman---Na-impound ang labin-limang motorsiklo na walang plaka sa ipinapatupad na No Plate No Travel Policy ng Pikit PNP noong Sabado.

Ayon kay Pikit Chief of Police Senior Inspector Elias Dandan, resulta ito ng kanilang inilagay na mga checkpoint sa mga pangunahing kalsada ng bayan.

Bahagi rin ito ng kanilang kampanya kontra sa mga riding-in-tandem na suspek sa pamamaril.

Matatandaang riding-in-tandem ang suspek sa sampung kaso ng pamamaril sa bayan ng Pikit.

Sa ngayon ay mas lalong pinalakas ng Pikit PNP ang kanilang koordinasyon sa kumunidad upang mas maging epektibo ang kanilang kampanya laban sa iba’t-ibang krimen.