2,500 na mga election support staff, BEIs sa North Cotabato; di pa nakatanggap ng kanilang honoraria

(Kabacan, North Cotabato/ May 30, 2013) ---Abot sa 2,500 na mga support staff at mga board of election inspectors o BEIs na nagsilbi noong May 13 local elections sa probinsiya ang di pa nakatanggap ng kanilang honorarium mula sa Commission on Elections o (Comelec).

Ayon kay Cotabato Provincial Election Supervisor Kendatu Laguialam may 2,817 mga guro ang probinsiya ang nagsilbi bilang BEIs noong nakaraang halalan at may kabuuang 2,203 na support staff.

Sa nabanggit na bilang ng mga BEIs, 800 pa lamang ang nabayaran sa pamamagitan ng kanilang cash cards habang ang iba naman ay nabigyan sa pamamagitan ng kanilang automated teller machine (ATM) accounts.

Pero ang ilang mga guro na nagsilbi bilang support staff ay hanggang ngayon di pa nakakatanggap ng kanilang election honorarium.

Ang nasabing sumbong ay una na ring inireklamo ng ilang mga guro sa Kabacan na nagsilbi noong nakaraang halalan na di pa rin nabayaran kagaya ng 89 na mga support staff at BEIs din sa bayan ng Arakan ang di pa nabayaran, ayon kay municipal acting officer Joel Celis.

Ipinaliwanag naman ni Laguialam na di naka tanggap ang ilang mga BEIs ng kanilang mga honoraria dahil sa bigong naka-apply ang mga ito ng kanilang cash card.

Aniya, may mga pangalan umanong hindi kabilang sa listahan na naisumite ng Department of Education (DepEd) North Cotabato sa Comelec.

Inamin ni Laguialam na hindi kasi nagkaroon ng proper coordination ang head office ng comelec sa mga election officer ng munisipyo bago nila isinagawa ang pagdeposito ng bayad .

Sa ngayon nagsumite na ng bagong listahan ang comelec North cotabato ng mga listahan ng mga nagsilbi sa eleksiyon para mabigyan na ng honorarium ang mga ito sa nagdaang eleksiyon sa lalong madaling panahon. (Rhoderick Beñez)