Waste to Energy technology, nakikitang solusyon sa Mindanao power crisis

(Midsayap, North Cotabato/April 13, 2012) ---Inilatag ng mga kinatawan ng Institute of Integrated Electrical Engineers o IIEE- Cotabato Chapter ang posibleng solusyon sa nararanasang power crisis ngayon sa Mindanao sa isinagawang caravan campaign sa Kapayapaan Hall, Congressional District Office of Hon. Jesus Sacdalan sa Midsayap, North Cotabato.

Ayon kay Engr. Antonio Herrera na siyang consultant ng Proposed Agricultural and Household Waste Utilization for Energy Generation Project, gagamitin sa proyektong ito ang mga agricultural wastes at household wastes upang maka- generate ng karagdagang supply ng kuryente.

Hindi naman maiwasang magtanung ng mga kinatawan ng iba’t- ibang sektor na dumalo sa natukoy na pagpupulong kung paano gagawin o maisasakatuparan ang nasabing proposed project. 

Sinabi naman ni Engr. Herrera na may dalawa umanong paraan upang maisagawa ang proyekto. 

Una, ang gasifier technology na paaandarin gamit ang mga organic wastes tulad ng rice husk, rice stalk at iba pa. Pangalawa, ang Flash Pyrolisis Method na paaandarin naman ng organic wastes, municipal solid waste tulad ng mga plastic, patapong gulong o tires ng mga sasakyan.

Umaasa ang asosasyon ng mga electrical engineers na susuportahan ng pamunuan ng bawat local government unit sa unang distrito ng North Cotabato partikular sa PPALMA Area ang solusyong kanilang inirerekomenda.

Patuloy din umano ang kanilang pakikipag- ugnayan kay North Cotabato First District Representative Jesus “Susing” Sacdalan upang makipagtulungan sa tanggapan nito dahil sa distritong nasasakupan nito ipapatupad ang nasabing waste to energy technology.

Kung magtatagumpay, magiging modelo ang unang distrito ng North Cotabato partikular ang PPALMA Area sa implementasyon ng waste to energy technology. (Roderick Bautista)