Cot PCDO 3rd Place sa Gawad Parangal 2015

AMAS, Kidapawan City (Oct 24) – Muli na namang pinatunayan ng Provincial Cooperative Development Office o PCDO Cotabato ang kakayahan nito sa pagpapalakas ng mga kooperatiba at pagpapaunlad ng buhay ng mga miyembro nito sa lalawigan.

Ito ay makaraang hirangin ang Cot PCDO bilang 3^rd Place sa katatapos lamang na Gawad Parangal 2015 Search for Best Provincial Cooperative Office na ginanap sa Philippine Trade and Training Center, Pasay City noong Oct. 23, 2015.

Mismong si Provincial PCDO Head Dr. Samuel Aquino ang tumanggap ng Plaque of Recognition sa awarding ceremony na pinangunahan ni Cooperative Development Authority (CDA) Chairman of the Board of Administrators Orlando Ravanera kasama ang iba pang opisyal ng CDA.

Maliban rito ay tinanggap rin ni Dr. Aquino ang isa pang plake matapos na manalo ang Cot PCDO bilang Best PCDO in Mindanao noong Agosto, 2015.

Nagwagi ng ikatlong puwesto ang Cot PCDO matapos na makitaan ito ng husay sa pagpapatupad ng mga programang pang-kooperatiba at paghikayat sa mga miyembro na palakasin pa ang kanilang mga hanay bilang mahalagang bahagi ng pag-unlad ng  lalawigan ng Cotabato.    

Tanging ang Cot PCDO lamang ang kooperatiba mula sa Mindanao na nakapasok sa Top 5 ng naturang search.

Ayon kay Dr. Aquino, hindi nila makakamit ang tagumpay at hindi mapapansin ang kanilang pagsisikap kundi dahil sa suporta ni Gov Emmylou “Lala” J. Taliño-Mendoza lalo na sa mga programang ipinatutupad ng Cot PCDO.

Sinabi rin ni Dr. Aquino na dahil sa tiwala ng Provincial Government of Cot sa kanilang hanay ay naisasakatuparan nila ang mga layunin ng Cot PCDO kabilang na ang pagbibigay ng mga technical training, loan at iba pang ayuda para sa mga kooperatiba.

Samantala, nakuha naman ng Batangas ang 1^st Place for Best Provincial Cooperative Development Office at 2^nd Place ang Isabela Province.

Ayon naman kay Gov Emmylou “Lala” J. Taliño-Mendoza, malaking karangalan ang ibinigay ng Cot PCDO para sa Lalawigan ng Cotabato at patunay lamang ito na kumikilos at ginagawa ng tanggapan ang lahat ng makakaya upang mapaunlad ang buhay ng nga miyembro ng mga kooperatiba. (JIMMY STA. CRUZ-PGO Media Center)