Karapatan at proteksiyon ng kabataan sa Cot province pinalakas pa ng Child and Youth Summit 2015

AMAS, Kidapawan City (Sep 25) – Sa layuning maisulong pang lalo ang karapatan at proteksiyon ng mga kabataan o youth, isinagawa ng Provincial Government of Cotabato ang 3-day Child and Youth Summit 2015 kung saan tinalakay ang mga nangungunang issues and concerns na kanilang kinakaharap.

Ayon kay Gov Emmylou “Lala” J. Taliño-Mendoza, mahalagang mabigyan ng kaukulang pansin ang mga kabataan dahil sila ang pag-asa at kinabukasan ng bayan kung kaya’t kailangan silang pakinggan at suportahan.

Nakapaloob sa tatlong araw na summit mula Sep. 23-25, 2015 ang paglahahad mismo ng mga kabataan ng mga problemang kanilang kinakaharap tulad ng kahirapan, kakulangan o kawalan ng edukasyon, child labor, drug abuse, rido, unstable peace and order sa ilang mga barangay na apektado sa labanan ng armadong grupo at military at iba pang mga suliranin.

Abot sa 400 na kabataan ang lumahok sa summit kabilang ang mga school and youth leaders, Sangguniang Kabataan, out-of-school youth at iba pang grupo ng kabataan mula sa tatlong distrito ng Cotabato.

Tema ng Child and Youth Summit 2015 ay Kuya, Ate sa Serbisyong Totoo, Go Na Tayo.

Mismong ang mga kabataan ang naglahad sa session ng kanilang mga suliranin at hamon sa buhay at kung ano sa tingin nilang  ang mga hakbang upang matugunan o masolusyunan ang mga ito.

Nagsagawa rin sila ng workshop, table discussions, reporting at open forum.

Nagsilbing mga facilitator ng summit sina Board Members Shirlyn Macasarte, Maybelle T. Valdevieso, Aire Claire Pagal at Dulia Sultan.

Miyembro naman ng Child and Youth Summit 2015 Technical Working Group sina Junmar Gonzales bilang Summit Director, Reynald Campo ng SP Cotabato, Ralph Ryan Rafael, Focal Person ng PGO Media Affairs at iba pa.

Layon din ng summit na pag-aralang muli ang Child and Youth Development Code ng Cotabato Province at alamin ang mga pagbabago na dapat ipatupad kaugnay ng naturang batas.

Sa ikatlo at huling araw ng summit ay nagpalabas ng isang Children Statement ang  mga partisipante.

Kaugnay nito, inaasahang lalakas pa ang hanay ng kabataan sa lalawigan at makamtan nila ang inaasam na pagbabago at kaunlaran. (JIMMY STA. CRUZ/PGO Media Center)