Mga ginagawa ng pamahalaang panlalawigan ng N. Cotabato sa panahon ng sakuna at kalamidad, inilatag

(Amas, Kidapawan City/ September 20, 2013) ---Inilatag kamakailan ng pamahalaang panlalawigan ng North Cotabato ang mga ginagawa ng probinsya sa panahon ng kalamidad at sakuna.

Sa naganap na Regional Summit on Disaster Risk Reduction and Management (DRRM) for Local Executives sa lungsod ng Heneral Santos, sinabi ni North Cotabato 1st district board member Noel Baynosa na nakasentro ang gawain ng kanilang Provincial Disaster Risk Reduction and Management Council (PDRRMC) sa adbokasiyang ‘Serbisyong Totoo’.

Ayon kay Baynosa, upang lalong makapaghanda sa mga hindi inaasahang pangyayari, namahagi ang pamahalaang panlalawigan ng mga babasahin kaugnay ng pagsawata sa epekto ng mga sakuna at kalamidad.

Abot sa P16 milyon ang pondong inilaan ng pamahalaang panlalawigan na ibinili ng mga kagamitan sa mga operasyon ng paghahanap at pagsagip.

Ang mga ito ay kinabibilangan ng anim na PVC boats, isang aluminum rescue 30-seater boat, mga early warning device system na inilagay sa bayan ng Alamada at Carmen at iba pang mga gadyet.

Binigyang-diin pa ni Baynosa na maliban sa mga ito, isinailalim naman sa mga pagsasanay noong mga nakaraang buwan ang mga tagapagsagip.

Sinabi pa niya na todo sa pagbibigay ng tulong at pagsasagawa ng mga serbisyong pangmedikal ang pamahalaang panlalawigan sa mga biktima ng trahedya at aksidente.

Katunayan nito, ilang mga barangay na ang napatayuan ng mga covered court at maraming mga lugar sa probinsya na rin ang nabahaginan ng mga multicab na kapwa mapakikinabangan sa panahon ng kalamidad at sakuna.