Illegal logging activities sa isang brgy sa North Cotabato, talamak; kampanya kontra dito mas pina-igting ng otoridad

(Kabacan, North Cotabato/July 6, 2012) ---Sariwa pa ang ilang mga pinutol na kahoy ng datnan ng mga otoridad ang pinaniniwalaang adopted watershed area ng Kabacan Water District sa bulubunduking bahagi ng Brgy. Pisan, Kabacan, Cotabato kahapon ng tanghali.

Ang illegal logging activities sa lugar ay nagiging talamak na makaraang nakakalbo na ang lugar dahil sa mga sindikatong gupo na gumagawa nito, na ayon sa report ay mga residente ng kalapit na brgy. ng Pisan kagaya ng brgy. Buluan, ayon sa isinagawang imbestigasyon ng pulisya.

Nanguna sa nasabing operasyon si Supt. Raul Supiter, hepe ng Kabacan PNP; Cotabato Police Public Safety Company na pinamumunuan ni P/Supt. Alex Tagum, 2^nd Manuever Company na pinangungunahan ni Insp. Peter Pinalgan.

Bagama’t walang naabutan ang mga elemento ng pulisya, titiyakin naman ng mga ito na mananagot sa batas ang mga responsable sa nasabing illegal logging sa lugar.

Kasama sa isinagawang operasyon kampanya kontra illegal logging ang Chief Forest Protection Unit ng DENR-CENRO na si Dionisio Hernandez, CENRO team leader Kabacan Amor Baniaga at Kabacan MENRO Officer Jerry Laoagan.

Tinatayang aabot sa mahigit kumulang sa anim na libo ang halaga ng mga pinutol na kahoy di pa kasali ang mga naipaanod na nila sa ilog.

 

Kabilang sa mga kahoy na talamak na pinuputol sa nabanggit na lugar ay ang G-melina at Molave.

Pero ang Molave, ay naturally grown na mahigpit na ipinagbabawal ang pagputol nito batay sa total log ban na ipinapatupad ni Pangulong Pinoy at deriktiba na rin ni Cotabato Gov. Emmylou “Lala” Taliño Mendoza.

Ayon sa CENRO Midsayap, ang bayan ng Kabacan ang sinasabing talamak ang illegal logging activities at sinusundan naman ng bayan ng Alamada, pero bago pa man lumala ang nasabing illegal na aktibidad sa Alamada ay nasugpo na nila ang nasabing gawain unang distrito ng North Cotabato. (Rhoderick Beñez)