Mga sundalo ng 57th at 62nd IB nakiisa sa Brigada Eskwela sa mga bayan sa North Cotabato na itinuturing na ‘impluwensiyado’ ng NPA

(Makilala, North Cotabato/June 4, 2012) ---Para higit na mapalapit sa taong-bayan, lalo na sa mga lugar sa North Cotabato na itinuturing na ‘impluwensiyado’ ng mga rebeldeng New Peoples’ Army o NPA, nakiisa sa Brigada Eskwela ang mga sundalo na miyembro ng 57^th at 62^nd Infantry Battalion.

         

Nagtapos kamakalawa ang Brigada sa mga bayan ng Magpet, Makilala, President Roxas, Antipas, Arakan, at sa Kidapawan City.

Ayon kay Lt. Col. Noel dela Cruz, acting commander ng 57^th IB, tumulong ang mga sundalo sa pagsasaayos ng drainage canal ng mga paaralan, pagpintura sa mga paaralan, pagsasaayos ng mga sira’ng upuan at blackboard, at iba pa.

         

Tiniyak nina dela Cruz na magiging ligtas, malinis, at maayos ang mga paaralan sa naturang mga lugar sa pagbubukas ng klase ngayong Lunes.

         

Ang Brigada ay isang programa na isinusulong ng Department of Education.

         

Sa pamamagitan ng Brigada, pinalalakas ang ‘bayanihan’ sa mga mamamayang Pilipino dahil na rin sa pagbibigay ng serbisyo sa mga pampublikong paaralan nang libre. (MCM)